Crazy Rich Asians : هل الفلوس تقدر تشتري كل حاجه؟
خليط سينمائي جميل هو اللي بيجمع بين الرومانسية والكوميديا مع بعض التراجيديا. خليط مش بيزعل حد من المشاهدين وبيرضي أكبر قدر ممكن منهم على الرغم من أختلاف أذواقهم. وخاصة جيل المراهقين والشباب من البنات واللي عاوزين يخرجوا من الواقع لمدة حوالي ساعتين مع فيلم خفيف. وهو ده بالظبط اللي بيقدمه فيلم Crazy Rich Asians
Crazy Rich Asians بيحكي عن بروفيسيرة نصف أمريكية – صينية بتقرر أنها تذهب في رحلة مع حبيبها الى سنغافورة علشان تتعرف على أسرته. وهناك بتكتشف أن حبيبها بينحدر من أسرة غنية جدا. وبتبدأ تتعرف عن قرب على حياة الطبقة الغنية. لكن هل هاتقدر الفلوس تخبي كل الحقائق؟!
إخراج جون أم تشو للفيلم كان واضح من البداية.. فيلم خفيف بيحاول يرضي كل الأذواق ويقدم تنويعات مختلفة على تيمات متنوعة علشان يوصل لهدفه. وده أمر كويس جدا.
وعلشان يوصل لهدفه قرر يستعين بفريق عمل قادر على توفير الأداء التمثيلي اللي محتاجه الفيلم. علشان كده بنشوف جيما تشان و ميشيل يوه و كونستانس وو. وواضح طبعا سبب الاستعانة بكل الممثلين من منطقة شرق أسيا بشكل يجعل الفيلم واحد من أكتر الأفلام القائم عليها فرق عمل كاملة من شرق أسيا.
المميز كمان في السيناريو والقصة أنهم مأخوذين من رواية حققت مبيعات قوية. لكن حسينا أن بعض الشخصيات الفرعية في الفيلم لم يتم التركيز عليها على العكس من الرواية. وده بسبب أن الفيلم لما بيركز على الأحداث مش بيقدر غير أنه يختار أحداث معينة فقط للتركيز عليها في حوالي ساعة ونصف. بينما الرواية تقدر تتناول أي قدر ممكن من الأحداث.
فيلم Crazy Rich Asians فيلم خفيف وساحر وبينقلنا بصريا – وماديا- لعالم مختلف تماما ومميز جدا. وننصح بمشاهدة الفيلم لعشاق الأفلام اللي بتقدم لكم من كل بستان زهرة.
