Destination Wedding: علاقة حب بين شخصيتين متناقضتين!
على الرغم من تفوقه في الفترة الأخيرة في سلسلة من أفلام الحركة زي John Wick إلا أن الكندي من أصل لبناني كيانو ريفز من الواضح أنه عاوز يجرب نفسه في أنماط تمثيلية مختلفة، وأدوار بعيدة عن بعضها علشان لا يحصر نفسه في تجربة تمثيلية واحدة ومحفوظة. لكن هل قدر يقدم لنا كوميديا جيدة في Destination Wedding؟
Destination Wedding بيحكي عن شخصين بيتقابلوا صدفة في المطار وهم في طريقهم لحضور حفل زفاف. وبعد تعارف قصير بيكتشفوا أنهم رايحين يحضروا نفس حفل الزفاف، وأنهم بشكل أو بأخر بتجمعهم المعرفة من بعيد. ومع تطور الأحداث بنكتشف أن الشخصيتين على طرفي نقيض تماما. وكل واحد فيهم مستني للتاني على غلطة، أو زي ما بنقول بالعامية (عاملين زي ناقر ونقير)!
مخرج الفيلم ومؤلفه هو فيكتور ليفن، وفيكتور ماعندوش تاريخ سينمائي كبير، وكان من الواضح أن الأداة الأساسية اللي أختارها علشان يوصل لنا كل أحداث الفيلم هي الحوار بين الشخصيتين الأساسيتين في الفيلم (كيانو ريفز و وينونا رايدر) على طول الخط الزمني للأحداث.
الحقيقة أن الحوار يعتبر واحدة من أهم أدوات الفيلم إن لم تكن الأداة الوحيدة اللي تم استخدامها لتوصيل مشاعر الأبطال، لكن من ناحية تانية حسينا أن بعض الجمل الحوارية تم إقحامها على الأحداث علشان يعبر كل بطل بيها عن حالته النفسية، بينما الحوار ده لو بيدور بين شخصين في العالم الواقعي كان لا يمكن يتم أبداً بالشكل ده!
الشخصيات الأساسية في الفيلم هي كيانو ريفز اللي بيقوم بدور (فرانك) واللي بيلاقي نفسه مجبر على حضور حفل زفاف ممل وتقليدي، علشان كده بيشعر ببعض الانجذاب ناحية (ليندسي) اللي بتلاقي نفسها هي كمان مجبرة على الحضور لأسباب بنشوف تفصيلاتها في الفيلم، ومن هنا بنعرف أن حتى لو الشخصيتين متناقضتين لكن ممكن يكون في بعض الأمور المشتركة اللي بتجمعهم. وبشكل عام الأداء التمثيلي للأبطال كان جيد وإن كان الاعتماد الأساسي على توصيل كل مشاعرهم كان زي ما قولنا من خلال الحوار المستمر.
الموسيقى التصويرية للفيلم كانت جيدة رغم تقليديتها، وكانت بتتحرك في إطار متسارع مع الأحداث وقدرت تدخلنا في المود العام للفيلم، خاصة مع الديكورات واختيار أماكن التصوير اللي تم بشكل جيد وجعل شعورنا بالفيلم بشكل عام يكون أفضل.
بننصح بمشاهدة Destination Wedding لو كان بالكم رايق وبتحبوا الأفلام اللي الأحداث فيها بتنضج على نار هاديه، ولو كانت مشاهد الحوارات الطويلة مش بتخليكم تشعروا بالملل.
علشان تبقى عارف: تقييم الفيلم على موقع IMDB هو ٦.١ من ١٠
