سوق الجمعة: الجمهور مش عاوز سينما الطبقة الوسطى!

مع نجاح افلام زي الفرح وكباريه وساعة ونصف والمولد وغيرها من الاعمال، بدأ كتير من المخرجين والمنتجين يتجهوا للعمل على تيمة أفلام بتجمع مجموعة أفراد من الطبقة الوسطى في مكان محدد لفترة زمنية معينة. ومن ثم يتابع الجمهور قصة كل واحد منهم.

لكن مع الوقت من الواضح أن الاتجاه ده بدأ يقل الاقبال عليه. وبشكل أو باخر بنحس ان الجمهور مش عاوز يتفرج على حياته على الشاشة بقدر ما عاوز اما افلام كوميدي تخرجه من مشاكله او اكشن تخليه ينسى كل حاجه وينسجم مع الاحداث.

سوق الجمعة بينتمي للنوعية دي من الأفلام، من خلال استعراض قصص مجموعة من المتعاملين في سوق الجمعة، سواء الباعة أو المشترين أو المتعاملين بشكل عام في السوق بشكل إسبوعي.

عمرو عبد الجليل واحد من أهم الفنانين في المجال الفني في مصر. بطل بيعرف يتكيف مع اي شخصية يقوم بيها و (يلبسها) بشكل كامل ويقدمها على الشاشة بشكل متميز وحقيقي جدا. وده كان واضح في دور الريس حربي اللي قدمه في مسلسل طايع رمضان الماضي. واللي يعتبر واحد من افضل المسلسلات في رمضان.

نسرين أمين و سهر الصايغ من النجوم اللي بينتموا لنفس المدرسة التمثيلية، وده كان واضح في الأداء التمثيلي اللي قدموه، وكان واضح أكتر مجهود سامح عبد العزيز المميز علشان يعيد تقديم اعماله القديمة من جديد بنفس النمط زي فيلم الليلة الكبيرة  أو كباريه أو مسلسل الحارة، وكلها أعمال تنتمي لنفس المنطقة والفكرة.

الفيلم بيضم أسماء قوية كمان زي محمود الجندي ومحمد لطف وصبري فواز ودلال عبد العزيز. وتقريبا كل الاسماء دي اشتركت في افلام بتتبع نفس النهج التأليفي والإخراجي. وكان واضح أن المؤلف محمد الطحاوي وكاتب السيناريو احمد عادل سلطان كانوا عارفين من البداية انهم بصدد العمل على ورق هايتم تحويله لفيلم بالاسلوب البانورامي المميز للنوع ده من الأفلام.

لعل السؤال الأهم اللي بنختم بيه كلامنا عن (سوق الجمعة) طالما الاداء التمثيلي والكتابة كويسين. ليه الفيلم مش عارف يعمل ايرادات كبيرة؟ الإجابة اننا في موسم عيد. والناس في الاعياد عاوزه افلام اكشن او كوميديا ومش عاوزه توجع دماغها بافلام عن الطبقة المتوسطة.

كمان من الواضح بشكل عام ان المشاهدين حاليا في مصر عاوزين اعمال تنسيهم الحياة اليومية و (تفك دماغهم) في تسلية لمدة حوالي ساعتين هي زمن الفيلم.

سوق الجمعة فيلم كان ممكن يحقق نجاح اكبر لو تم عرضه في توقيت مختلف. ونراهن انه هايحقق نجاح كبير مع العرض في الفضائيات.

نصيحة كايرو360: عمرو عبد الجليل بطل الفيلم قدم دور مميز في مسلسل طايع رمضان الماضي