بني آدم : يوسف الشريف بيراهن من جيد على السينما

على الرغم من تحقيق يوسف الشريف لنجاح كبير في مجال التليفزيون والمسلسلات الرمضانية اللي حققت نجاح كبير في السنوات الماضية، الأمر اللي جعل أسم يوسف علامة على نجاح أي مسلسل يشارك فيه. لكن الحظ السعيد لم يكن حليف الشريف في أعماله للسينما.

بداية من أعمال زي 7 ورقات كوتشينة وفتح عينيك وأخر الدنيا وغيرها، كان نجاح يوسف الشريف متواضع، حتى مع مشاركته في أفلام قوية زي هي فوضى سنة 2007 للعالمي يوسف شاهين فضل يوسف الشريف محتاج فيلم يعيد تقديمه للناس بعد سلسلة من النجاحات في الدراما التليفزيونية. وده كان رهان يوسف الشريف اللي ما قدمش مسلسل رمضاني العام الماضي علشان يتفرغ له.

بني أدم بيحكي عن لص محترف بيعيش حياة مزدوجة، بين حياته كخارج عن القانون بيشتغل مع مجرم غامض (قام بالدور محمود الجندي) وبين حياته كرجل أعمال أمام زوجته (دينا الشربيني). لكن الحياة دي بتتعرض لمشكلة كبيرة مع بحث ضابط شرطة (أحمد رزق) عنه ومطاردته ومحاولة الإيقاع به.

سيناريو الفيلم قائم على حبكة الألتواءات Plot twist وهي المفاجأة اللي بنكتشفها في أخر الأحداث. ده التكنيك اللي حقق بيه يوسف الشريف نجاحه في كل مسلسلاته تقريبا وده اللي قرر يرجع لنا به مع أحمد نادر جلال مخرجا و عمرو سمير عاطف مؤلفا. لكن مشكلة الألتواءات أنها اما تعجب المشاهدين جدا أو تخليهم ينفروا من الفيلم جدا. مافيش هنا حلول وسط.

يوسف الشريف قدم أداء تمثيلي قوي لكن غير مختلف عن أداؤه في المسلسلات، لكن بشكل عام يوسف من الوجوه اللي الكاميرا بتحبها ومجهوده وشغله على نفسه بيخليه دايما في مصاف النجوم اللي الجمهور بيتابعها باستمرار.

على الرغم من تقدم محمود الجندي في العمر الا إنه قادر يقدم أي دور يسند اليه بشكل متميز. خاصة مع تغيير ملامحه وطريقته في الكلام بالشكل اللي يناسب كل دور بيقوم بيه. أما البطولة النسائية لدينا الشربيني مع هنا الزاهد فكان أداؤهم جيد لكن في المنطقة النمطية المحفوظة الخاصة بهم

من الأمور المميزة اللي لاحظناها في الفيلم الديكورات وتوظيف الموسيقى التصويرية لخدمة الأحداث بشكل جيد، ودي من الأمور اللي تحسب للفيلم وجعلت تجربة مشاهدته أفضل.

بني أدم.. محاولة يوسف الشريف للرهان على السينما والعودة لها بعد تحقيق النجاح في التليفزيون. الوقت وحده اللي هايحكم على مدى نجاح التجربة دي.

نصيحة كايرو360: يوسف الشريف مش الأسم الحقيقي للنجم المشهور، لكن أسمه الحقيقي هو محمد إسماعيل ناجي، وتم الاتفاق مع المخرج شريف صبري على تغيير الأسم في بداية عمل يوسف الشريف في السينما.