الرجل الأخطر: لصوص ولكن ظرفاء في شكل جديد

قصص السرقات المنظمة ومحاولة فريق واحد أنه ينفذ عملية صعبة بيكون مصدر اما للأكشن والمغامرة والمطاردات. أو الكوميديا زي ما بنشوف في أفلام كتير. وهي دي السكة اللي قرر الفنان سامح حسين انه يمشي فيها في أحدث أعماله (الرجل الأخطر)

الفيلم بيحكي عن رجل بيقرر يكون مجموعة يسرق بيها أحد البنوك، الأمر اللي بيدخلهم في سلسلة من الكوميديا والمواقف الكوميدية اللي مش بتنتهي، مع محاولة أعادة تقديم فيلم لصوص ولكن ظرفاء واللي تم تقديمه سنة 1969 من بطولة عادل امام وأحمد مظهر.

مستوى الكوميديا في الفيلم مش عالي أو مميز وده بسبب الاعتماد على الايحاءات الجنسية أو الايفيهات الكلامية اللي تصلح كنكت منفصلة، طبعا حاول المؤلف جوزيف فوزي يضع بعض المواقف الكوميدية واللي كانت جميلة وجيدة لكن قليلة.

مافيش كلام كتير نقدر نقوله عن الأداء التمثيلي لأن كل واحد من أبطال الفيلم سواء سليمان عيد أو سامح حسين أو ادوارد قدم الأداء العادي واللي بنشوفه في كل عمل له بدون أي محاولة للتجديد او تقديم حاجه مختلفة عن باقي الأدوار.

المخرج مرقس عادل قدم مستوى اخراجي جيد ومتناسب مع طبيعة الفيلم وميزانيته اللي بتتناسب هي كمان مع توقيت عرضه في فترة الصيف بعيدا عن فترة الأعياد اللي منتجين كتير منتظرين الوصول لها لطرح الأفلام القوية والثقيلة.

الرجل الأخطر فيلم خفيف وظريف وينفع للمشاهدة في إجازة نهاية الأسبوع.

علشان تبقى عارف: الفنان سامح حسين من أشهر ممثلي الكوميديا في مصر. قدم أدوار كتير لكنه اشتهر بدوره في مسلسل (راجل وست ستات) مع أشرف عبد الباقي.