Mission: Impossible – Fallout : اثارة تحبس الأنفاس مع توم كروز
موضوع واحد لا يكفي للكلام عن واحدة من أفضل سلاسل أفلام الأكشن اللي انتجتها هوليود. علشان كده اتكلمنا باستفاضة أكتر عن السلسلة وتاريخها في موضوع سابق لنا علشان نتفرغ في موضوعنا الحالي للكلام أكتر عن الجزء الأحدث والأقوى من السلسلة واللي بيصدر تحت أسم Mission: Impossible – Fallout
الفيلم بيحكي عن سباق بين مجموعة من أجهزة المخابرات الدولية للحصول على 3 كرات من البلوتونيم المشع، قبل تجميعهم في قنبلتين نوويتين واستخدامهم من قبل منظمة إرهابية مجهولة الهوية لتنفيذ هجمات إرهابية مميتة.
وفي سبيل إيقاف العملية الإرهابية بيتم تكليف فريق المهمة المستحيلة بقيادة ايثان هنت (توم كروز) و لوثر (فينج راميز) و سايمون بيج اللي بيقوم بدور بينجي دن مع عميل جديد بيتم اضافته للتأكد من قيام (هنت) بالعملية بشكل صحيح.
من أكتر الحاجات اللي لاحظناها في الجزء الجديد من السلسلة الاهتمام بأضافة بعد كوميدي كان موجود في كل الأجزاء السابقة لكن تمت زيادة مساحته في الجزء الجديد بشكل أكبر. كمان كان فيه اهتمام باظهار الجانب الإنساني لـ (ايثان هنت) كعميل بياخد أحيانا قرارات غلط أو مش بيقدر يتغلب على بعض الخصوم على العكس من الأسطورية اللي كان بيتم اظهاره بيها في الأجزاء السابقة.
على الرغم من تقدمه في العمر لكن توم كروز قدر يقوم بدوره بشكل ممتاز خاصة لما عرفنا انه قدم بعض مشاهد الحركة بنفسه بدون دوبلير، أما باقي الابطال فعرف كل واحد فيهم يعطينا استمرار لشخصيته في الأجزاء السابقة مع تحسينات جديدة ومميزة.
المخرج والمؤلف كريستوفر ماكويري قدر يقدم لمحبي السلسلة القدامي اللي هم عاوزينه من تنكر وخدع وتقمص شخصيات، وكمان قدر يجذب محبين جدد للسلسلة من خلال تقديم مجموعة مميزة من مشاهد الاكشن والالتحام اليدوي واستعمال التكنولوجيا الحديثة في القتال.
طبعا الموسيقى التصويرية كانت في أحلى حالاتها نتيجة الاعتماد على التيمة الموسيقية القديمة للسلسلة واللي بتخلينا نشعر بالحماسة مع كل مرة بنسمعها. وتعتبر الموسيقى واحدة من اهم عناصر تفوق الفيلم بشكل عام، بالإضافة طبعا لاماكن التصوير المتنوعة والديكورات المميزة.
تجربة مشاهدتنا للفيلم في سينما ايماكس اعطتنا تجربة مختلفة ومميزة جدا. من حيث تجسيم الشخصيات او العرض على الشاشة الكبيرة. والحقيقة اننا بننصح الجميع بمشاهدة الفيلم بتقنية ايماكس للمزيد من المتعة والواقعية في المشاهدة.
Mission: Impossible – Fallout واحد من أحلى أفلام الأكشن اللي شوفناها مؤخرا ضمن واحدة من افضل السلاسل اللي بتقدم النوعية دي من الأفلام.
علشان تبقى عارف:
المخرج (كريستوفر ماكويري) هو أول مخرج يقوم بإخراج أكثر من فيلم من أفلام السلسلة.
