ورطة إنسانية.. هاتعمل ايه لو مكان الناس دي؟!
تعمل ايه لو كنت ماشي في الشارع ولقيت بنت بتسألك اذا كان المفروض تخلي أمها تشتري لها الثلاجة اللي بتتمناها علشان الجوازة بتاعتها ما تبوظش، وفي نفس الوقت الأم بتقول لك أنها لو عملت كده هاتتسجن علشان مش معاها الفلوس؟!
قبل ما تجاوب فكر كويس علشان ممكن تكون اجابتك متسجلة على الكاميرات في برنامج (ورطة إنسانية) واللي بيشبه برامج الكاميرا الخفية لكن علشان يوصل لنا رسالة من خلال أحداثه مش لمجرد أثارة الضحك.
بعد تتر بداية البرنامج بنبدأ نشوف الموقف اللي بتتناوله الحلقة، من خلال رسم بعض تفاصيله امامنا على الشاشة، ثم بنبدأ نشوف الممثلين وهي بتأدي أدوارها بثقة والكاميرات اللي بتصور ردود أفعال الناس في الشارع.
في أحد الحلقات بنشوف شاب شايل يافطه بيطلب من الناس تتبرع لوالده بالدم علشان بيعمل عملية خطيرة. وبنشوف رد فعل الناس اللي بتهتم وبتطلب انها تروح تتبرع، وبعض الناس التانية اللي بتساعد الولد بالفلوس.
في حلقة تانية بنشوف مجموعة شباب بيألسوا على بنت وزنها زايد، وبنشوف رد فعل الناس في المول على عملية التنمر اللي بتحصل قدام عينهم.
وفي أحد الحلقات بنشوف بنت بتضغط على والدتها علشان تشتري لها ثلاجة في جهازها رغم ان ده ممكن يتسبب في سجن الأم.
بعض الناس بترفض التعاون او الاستماع اوالاهتمام بالأساس. والبعض التاني بيقول كلمتين يرضي بيهم ضميره ويمشي. لكن قلة من الناس بتقف وتثبت موقف وتحاول تصلح الوضع بنفسها، زي البنت الشجاعة اللي تصدت لمحاولة البنت اللي من فريق عمل البرنامج انها تضغط على أمها وصممت تاخد الأم معاها علشان تنقذها.
الجميل في (ورطة إنسانية) انه مش بيهدف للضحك، لكن بيورينا حاجات كتير عن شخصيات كتير من الناس ممكن تكون غايبه عنا، لكن من ناحية تانية المواقف اللي بيقدمها البرنامج بيكون واضح جدا فيها الطرف الصح من الطرف الغلط. بالتالي الشخص اللي بيتعرض للموقف مش بيختار كتير في انحيازه الأخلاقي. لكن من ناحية تانية البرنامج بيعرفنا اننا غلط نكون سلبيين لما نشوف موقف واضح فيه مين غلط ومين صح.
لو كنت مكان واحد من ضيوف البرنامج هل هاتكتفي بالكلام ولا هاتتدخل لتصليح الغلط ولا (هاتفض) لكل حاجه وتمشي في طريقك؟
