قلب أمه: أحلى كوميديا في العيد ولا ايه؟!
لما بنتكلم عن افضل فيلم كوميدي في العيد أكيد بيكون مش قصدنا افضل فيلم كوميدي على الاطلاق. لان الأفلام اللي بتصدر في فترة العيد بيكون لها دايما معاييرها الخاصة من حيث اختيار نوعية الجمهور اللي بتتوجه لهم الأفلام دي وقدرة الأفلام دي على البقاء والمنافسة وتكوين ذكرى طويلة المدى في دماغ المشاهد.
قلب أمه فيلم بيأتي من فريق من الممثلين اتعودنا عليهم وقدروا يكونوا مجموعة ضخمة من المعجبين والمتابعين اللي هايتفرجوا على أي عمل لهم ينزل في أي وقت. هشام ماجد وشيكو – وكان معاهم احمد فهمي قبل كده – قدروا يتركوا علامة قوية ومؤثرة على الأفلام الكوميدية اللي قدموها مؤخرا وقدرة الأفلام دي على تحقيق النجاح وجذب عدد كبير من الجمهور.
قلب امه بيحكي عن فكرة فانتازية عن شاب عايش مع امه (دلال عبد العزيز) اللي بتموت فجأة، في نفس توقيت تعرض مجرم مشهور (شيكو) لحادث بيتم نقل قلب الأم له، ومع الوقت بيبدأ يتكون عنده حنين ناحية الابن (هشام ماجد)، الأمر اللي بينتج عنه سلسلة لا تتوقف من المواقف والمشاهد الكوميدية.
مخرج الفيلم عمرو صلاح استعان بفريق عمل من اشهر الوجوه الكوميدية زي بيومي فؤاد و محمود الليثي و محمد ثروت و أحمد سلطان. كل الأسماء دي قدرت تثبت نفسها الفترة الأخيرة وتقدم اعمال اما منفصلة او مع بعضهم كفرق عمل، وكتير منها حقق نجاح كبير ومميز.
بنعيب على الفيلم انه بيضع كل الابطال في مناطق ثابتة من الأداء بدون أي محاولة لسحبهم لمناطق جديدة او تقديم نوعية جديدة من الكوميديا، لكن هو ده المعتاد من الأفلام اللي بيتم طرحها في فترة العيد وحب المنتجين لعدم المخاطرة في الاعمال اللي بيتم تقديمها في الفترة دي
لو كنت من محبي هشام ماجد وشيكو ونوعية الأفلام اللي بيقدموها، ما تضيعش وقت واحجز تذكرتك فورا لفيلم قلب امه.
علشان تبقى عارف:
احتفل ابطال الفيلم بالعرض الخاص للفيلم في سينما نايل سيتي
