Death Wish: هل ينفع ننفذ العدالة بنفسنا؟

السؤال اللي طرحناه على نفسنا بعد مشاهدة الفيلم، هل ينفع نحاول ننفذ العدالة بنفسنا أم يجب أننا ننتظر تنفيذه بواسطة الناس اللي ليها السلطة أنها تنفذه؟ ياترى أنتوا ايه أجابتكم على السؤال ده؟ تعالوا نتعرف أكتر على فيلم Death Wish

القصة

Death Wish بيحكي عن جراح محترف قضى حياته في محاولة انقاذ حياة الناس، لكن  الأمر بيختلف بعد تعرضه هو وأسرته لاعتداء وحشي، الأمر اللي بيخليه يقرر ينفذ القانون بنفسه وينتقم لحقه وحق أسرته. لكن هل هاينجح في اللي ناوي عليه أم هايفشل؟

فريق العمل

Death Wish من أخراج  ايلي روث وتأليف  جو كارنهان اقتباسا عن رواية  برايان جارفيلد ومن بطولة  بروس ويلس و إليزابيث شو و فينسنت دونوفريو و دين نوريس و جاك كيسي و لين كاريو

الأداء التمثيلي

على الرغم من تقدمه في العمر إلا أن بروس ويلز قادر على تقديم أداء تمثيلي عالي ومميز جدا، وقدر بتعبيرات وجهه وأداؤه التمثيلي أنه ينقل لنا المعاناة الداخلية لبطل الفيلم، ورغبته طوال الوقت في تحقيق الانتقام والعدالة من وجهة نظره بالشكل اللي شايفه صح، وده اللي نجح فيه بروس ويلز بالأضافة لمشاهد الأكشن اللي نجح في تأديتها بشكل مميز على الرغم من تقدمه في العمر زي ما سبق وقولنا.

السيناريو والحوار والأخراج

سيناريو الفيلم كان قوي ومحكم، لكن بيعيبه في نفس الوقت أنه مافيهوش أي تجديد أو محاولة للخروج عن الاطار التقليدي للقصة، على الرغم من أن حبكة الفيلم متشابهة مع حبكات كتير من الأفلام والقصص وكنا بنتوقع بعض التغيير أو محاولة الخروج عن الأطار التقليدي لكن ده لم يحدث وشعرنا معه ببعض الأحباط.

الديكورات والموسيقى والأزياء

ديكورات الفيلم نقلتنا بصريا للمجتمع الأمريكي اللي بيعاني من انتشار الجريمة، كمان الموسيقى التصويرية القوية والمحكمة قدمت أداء جيد وقدرت تقنعنا بقوة كتير من المشاهد واللي حسينا أنها هاتكون أضعف بدون استخدام الموسيقى المناسبة.

الخلاصة

فيلم Death Wish بيقدم قصة عن تنفيذ العدالة، وهل ينفع ننفذ العدالة بنفسنا أم يجب انتظار العدالة بالقانون والمحاكم؟

علشان تبقى عارف: الفيلم بيقدم إعادة  انتاج لفيلم قديم بنفس الأسم تم تقديمه عام 1974