Crooked House: جريمة جديدة من عوالم أجاثا كريستي

على الرغم من أن حبكات روايات أجاثا كريستي تم استنساخها واقتباسها مئات المرات في كتير من الأعمال الفنية والدرامية سواء المصرية أو الأجنبية، إلا أننا كل ما بنشوف فيلم مقتبس عن أحد رواياتها بنشعر بروحها بتطل من بين الأحداث وبتقدم لنا جرعة جديدة من التشويق والأثارة.. تعالوا نتعرف أكتر على Crooked House

القصة

بالنسبة لفيلم Crooked House من الصعب جدا أننا نتطرق للقصة بدون حرق للأحداث، ولأن حرق الأحداث في فيلم بوليسي يعتبر من أسوأ الحاجات اللي ممكن تخلي المشاهدين تكره تكملة الفيلم من الأساس، هانكتفي أننا نقول أن الفيلم بيتناول جريمة غامضة وبيتم الاشتباه في مجموعة كبيرة من المشتبه فيهم، لكن الأحداث بيحصل فيها مجموعة من الألتواءات اللي هاتخلي المشاهدين تشك في جميع الممثلين.

فريق العمل

الفيلم من اخراج جيل باكيه برينر ومن تأليف جوليان فيلوز اقتباسا عن رواية أجاثا كريسيتي الكاتبة الشهيرة والفيلم من بطولة كريستينا هندريكس و جيليان أندرسون و جلين كلوز و تيرينس ستامب  و ماكس آيرنز و أماندا أبينجتون

الأداء التمثيلي

الأداء التمثيلي لكل الأبطال كان متميز جدا، على الرغم من التغيرات الكبيرة اللي بتحصل في شخصيات البعض واللي بتتطلب من الممثلين اللي بيقوموا بالأدوار دي أنهم يكونوا مركزين جدا و (مذاكرين) الشخصيات اللي بيقوموا بيها بشكل كويس علشان ما يطلعش أدائهم مبالغ فيه.

السيناريو والحوار والأخراج

سيناريو الفيلم صعب شويه ومحتاج تركيز كبير واهتمام بالمتابعة، والأخراج حاول يبسط الأحداث والمشاهد الى اقصى درجة من خلال توجيه الممثلين للقيام بادوارهم بانسيابية وهدوء، لكن في نفس الوقت نجح المخرج في التلاعب بالمشاهدين وتوجيه انتباهنا لنقطة ثم التوجه لعكسها تماما.

الديكورات والموسيقى والأزياء

ديكورات الفيلم كانت مميزة الى اقصى حد، ونقلتنا زمنيا ومكانيا لزمن ومكان الأحداث، وقدرت الديكورات تتحد مع الإضاءة وزوايا التصوير علشان تقدم لنا في النهاية متعة بصرية ممتازة جدا،لكن الموسيقى على الرغم من قوتها كان عندنا شعور أنها ممكن تكون أفضل واقوى من كده.

الخلاصة

Crooked House فيلم هايتلاعب بعقل المشاهدين وطريقة تفكيرهم، وبيثبت لنا أن عالم أجاثا كريستي ممكن يطلع منه الكثير والكثير من الأفلام القوية.

علشان تبقى عارف:

تقييم الفيلم على IMDB 6.3 من 10