Open Water 3: Cage Dive: اللي بيخاف من البحر ما يتفرجش!

بعض أفلام الرعب مش بتبني قصتها على الاشباح والأرواح والكائنات المخيفة، لكن بتبنيها على افتراضات بسيطة من اللي ممكن تحصل لأي شخص.. تخيل أنك غطست في الماء علشان تصور فيلم وثائقي، وفجأة حصلت كارثة تخلي رجوعك للمركب مستحيلة؟ افتراض بسيط لكن مرعب في نفس الوقت… صح؟

القصة

Open Water 3: Cage Dive بيحكي عن مجموعة أصدقاء بتصور فيلم وثائقي عن أسماك القرش، وبيتحول الفيلم لمحاولة يائسة للبقاء على قيد الحياة بعد تحول التصوير لكارثة بحرية مرعبة بكل المقاييس.

فريق العمل

الفيلم من تأليف وإخراج  جيرالد راشيوناتو ومن بطولة  بيتي فالي و ميجان بيتا هيل و جوش بوتهوف و جويل هوجان

الأداء التمثيلي

الأداء التمثيلي لكل الابطال كان رائع وقدروا يضعونا فعلا في نفس الشعور النفسي كما لو كنا مكانهم، وعلى الرغم من ظروف التصوير الصعبة لكنهم قدروا يقدموا لنا في النهاية أداء مميز وقوي.

السيناريو والحوار والأخراج

سيناريو الفيلم منقسم الى جزئين. الجزء الأول ما قبل الحادثة والجزء الثاني ما بعد الحادثة، والحقيقة أن جزء ما قبل الحادثة بياخد وقت طويل نسبيا وده ممكن يخلى كتير من المشاهدين يشعروا بالملل خاصة اللي عارفين اللي هايحصل

الديكورات والموسيقى والأزياء

الفيلم معتمد بشكل أساسي على التصوير في البحر بالتالي التحدي الأكبر من وجهة نظرنا كان تطويع المعدات للتصوير في البحر لفترات طويلة وتدريبات السباحة والغوص وما الى ذلك. وده على الرغم من أنه يبان سهل وبسيط لكن تنفيذ فيلم في وسط البحر يعتبر من الأمور الصعبة واللي بتحتاج تجهيزات كبيرة.

الخلاصة

فيلم Open Water 3: Cage Dive بيقدم الرعب بشكل مختلف.. رعب ممكن يحصل لأي واحد فينا.. ياترى سألتوا نفسكم هاتعملوا ايه لو كنتم مكان ابطال الفيلم؟!

علشان تبقى عارف:

تقييم الفيلم على موقع IMDB 4.1 من 10