Message from the King: هل العنف هو الحل لمعرفة الحقيقة؟

يمكن أهم سؤال بيطرحه فيلم Message from the King . هل يمكن اعتبار العنف والدم هم البديل لما نعوز نوصل لمعلومة معينة؟ وهل يمكن للعنف وحده أنه يقدم الحلول لكل المشكلات أم أن الذكاء وتوظيف المعلومات بشكل صحيح هم كمان بيعلبوا دور مهم في الوصول للحقيقة؟

القصة

Message from the King بيحكي عن أخ بيحقق في وفاة أخته، من خلال تتبع خط سيرها وسفرها لأحد  المدن، الأمر اللي بيدخله في رحلة طويلة قوامها العنف والدم علشان يقدر يعرف الحقيقة. لكن هل هايعرفها في النهاية؟ مش عاوزين نحرق عليكم الأحداث أكتر من كده.

فريق العمل

Message from the King من اخراج  فابريس دو ويلز وتأليف  أوليفر بوتشر ومن بطولة  شادويك بوسيمان و  لوك إيفانز و ألفريد مولينا و تيريزا بالمر و آرثر داربانيان و جيمس جوردان

الأداء التمثيلي

الأداء التمثيلي لأبطال الفيلم كان جيد، ونخص هنا شادويك بوسيمان واللي قام بدور البطولة بشكل مميز، ومن الواضح أنه اضطر يخضع لنظام تدريبي علشان يقدر يقوم بحركات الأكشن اللي قام بيها، وكل ده يحسب له كممثل مجتهد عاوز يقوم بالدور الخاص به على أكمل وجه.

السيناريو والحوار والأخراج

سيناريو الفيلم هايحتاج بعض التركيز من المشاهدين والاهتمام بالتفاصيل، لكن طبعا لازم نفهم أن البطل لازم يقوم ببعض الأفعال الخارقة علشان يحوذ اعجاب المشاهدين، بالتالي لازم المشاهدين (تمشي حالها) في بعض المشاهد وماتحكمش المنطق والعقل في كل مشهد بتشوفه.

الحوار في الفيلم كان قوي ومميز وقدر الممثلين يضعوا جزء كبير من جهدهم التمثيلي في خروج الحوار بشكل مميز، وده كله في النهاية يعتبر نجاح للأخراج.

الديكورات والموسيقى والأزياء

اعتمد الفيلم بشكل كبير على الديكورات الخارجية والتصوير في المناطق المفتوحة، مع حركة كاميرا مميزة وتصميم معارك رائع وأقرب ما يكون للحقيقة، لكن للأسف شعرنا أن الموسيقى التصويرية كان المفروض تكون أفضل وأقوى علشان نشعر بوقعها مع الأحداث.

الخلاصة

Message from the King فيلم قوي ومميز وننصح بمشاهدته لمحبي أفلام الأكشن والعنف.

علشان تبقى عارف:

تم عرض الفيلم في الولايات المتحدة الأمريكية أولا في أغسطس 2017