حليمو اسطورة الشواطئ: فشل الخلطة القديمة للأفلام
في أوساط العاملين في مجال السينما فيه خلطة قديمة ومضمونة النجاح، قائمة على مجموعة من الأيفيهات الكوميدية مع بعض الأغاني الشعبية وبعض بطلات الصف الثاني مع نجم كوميدي، والنتيجة دائما بتكون النجاح.
لكن على الرغم من محاولة صناع فيلم حليمو أسطورة الشواطئ اللعب على نفس التوليفة القديمة، لكنه ماقدرش يحقق نفس النجاح. تعالوا نحاول نتعرف أكتر على الأسباب.
القصة
حليمو أسطورة الشواطئ بيحكي عن رجل اسمه حليمو بيشتغل في الأنقاذ البحري، لكنه في نفس الوقت مش بيعرف يعوم، الأمر اللي بيترتب عليه مجموعة كبيرة من المواقف الكوميدية واللي بتعتمد في المقام الأول على ردود أفعال حليمو على المواقف اللي بتحصل حواليه
فريق العمل
الفيلم من اخراج محمد سعيد ومن تأليف محمد فضل ومن بطولة طلعت زكريا ونرمين ماهر ودينا وهبه السيسي وخالد حزاوي ورامي غيط
الأداء التمثيلي
الأداء التمثيلي لأبطال الفيلم كان في دائرة الأداء النمطي المحفوظ والمتوقع من الأبطال دي. بدون أي زيادة أو محاولة لتقديم أداء مختلف أو جديد، بشكل أو بأخر حسينا أن معظم المشاركين في الفيلم كانوا بيعملوا (سبوبة) بالمعنى الدارج للكلمة. مجرد مشاركة في فيلم علشان الفلوس.
السيناريو والحوار والأخراج
سيناريو الفيلم سهل الفهم ومافيهوش أي تعقيدات، والحوار كان هو المُعتمد عليه بنسبة 100% تقريبا علشان يقدم الايفيهات والمواقف الكوميدية، والإخراج لم يبذل مجهود علشان يقدم أي جديد على مستوى الأحداث وباقي العناصر المكونة للأفلام بشكل عام.
الديكورات والموسيقى والأزياء
طبعا من الصعب أننا نتكلم عن الديكورات أو الموسيقى في فيلم تقليدي بيحاول يقدم لنا الخلطة أو التوليفة القديمة للأفلام متوسطة النجاح. وللأسف الديكورات والموسيقى جاءت في مستوى أقل من العادي والمقبول.
الخلاصة
فيلم حليمو أسطورة الشواطئ دليل كبير على أن الخلطة القديمة للأفلام واللي بيستسهل كتير من المنتجين ويقدموها لنا، من الواضح أنها مش هاتحقق نجاح كبير الفترة القادمة.
علشان تبقى عارف: طلعت زكريا بطل الفيلم واحد من نجوم الكوميديا في مصر، قدم مشاركات صغيرة في عدد كبير ومهم من الأفلام والمسلسلات في بداية حياته الفنية، ثم قدم فيلم طباخ الرئيس اللي أطلق شهرته واللي يعتبر واحد من أهم الأفلام اللي قدمها. مشهور عنه أراءه الجريئة في عالم السياسة والفن.
