عمر خريستو: سمك لبن تمر هندي!
للأسف الشديد الأفلام اللي بتحاول من خلال قصتها تناقش كل قضايا الدولة والعالم. وتقدم حلول سحرية ورؤية نمطية للأحداث حواليها. بتفشل في النهاية في معالجة أي قضية. وياريتها في البداية كانت ركزت على حاجه واحده بس!
عمر خريستو بيحكي عن قبطان بيتم الضغط عليه باختطاف بنته علشان يشارك في عملية إرهابية. لكن في نفس الوقت بتحاول الأجهزة الأمنية تحبط المخطط ده وتتصدي للي بينفذوه.
الفيلم من تأليف عاطف عبد اللطيف وسيناريو جوزيف فوزي وإخراج سيف يوسف. والحقيقة أن سيف هو مخرج مسلسل الكبريت الأحمر الجزء الأول والجزء الثاني من مسلسل نصيبي وقسمتك. لكن تاريخه الفني فيه بعض الأعمال اللي لم تحقق نجاح زي فيلم جدو نحنوح
الفيلم من بطولة أحمد السلكاوي. وأحنا فاكرين أحمد من دوره في مسلسل ونوس واللي قدم فيه دور (مراد) طليق حنان مطاوع. وشارك في أدوار تانيه في فيلم الكويسين و ياباني أصلي وغيرها من الأعمال.
بيشارك السلكاوي في البطولة دومينيك حوراني وهي مطربة لبنانية حققت شهرة كبيرة في فترة انتشار الفيديو كليب في مصر. وبشكل عام فريق العمل للفيلم مش مُبشر على الإطلاق بتقديم أي أداء تمثيلي جيد.
لكن من ناحية تانيه اختيار زوايا التصوير والتصوير في مناطق بحرية مفتوحة كان له أثر جيد على المشاهدين. لكن للأسف اختيار أماكن التصوير لوحده مستحيل يقدم فيلم جيد في النهاية. والمشكلة الأكبر للفيلم كانت القصة والسيناريو اللي زي ما قولنا بتحاول تحل كل قضايا المنطقة العربية في حوالي ساعة ونصف!
بنرشح فيلم عمر خريستو لمحبي الأفلام اللي بتناقش قضايا كتير في وقت قليل مع بعض الاستعراض وشوية لقطات بحرية كويسه. لكن مع أداء تمثيلي ضعيف.
