Holmes & Watson : نسخة كوميدية عن المحقق الأشهر
شرلوك هولمز المحقق المشهور وصديقه الدكتور واطسون. ثنائي من أشهر الثنائيات السينمائية والروائية في التاريخ. الفكرة بدأت في عقل الكاتب الشهير أرثر كونان دويل، واللي حولها لسلسلة روايات مشهورة حققت نجاح كبير. وتم تحويلها لأفلام ومسلسلات لا حصر لها لعل أشهرها مسلسل Sherlock من بطولة العالمي بينيديكت كامبرباتش.
لكن فيلم Holmes & Watson بيقدم لأول مرة النسخة الكوميدية من قصة المحقق الأشهر في التاريخ. تعالوا نتعرف أكتر على الفيلم.
Holmes & Watson بيحكي عن شرلوك هولمز وصديقه واتسون اللي بيحققوا في قضية من قضاياهم المشهورة. لكن المرة دي من خلال سلسلة لا تنتهي من المواقف الكوميدية، واللي بيقع فيها الثنائي أثناء محاولتهم معرفة الجاني وفك لغز القضية.
وعلى الرغم من أن الفيلم فيه كتير من المواقف الكوميدية لكن الكوميديا المعتمدة على المواقف مش كتير قوي. والاعتماد الأكبر على الكوميديا من الايفيهات، واللي بعضها مش هايكون كويس للمشاهدين المحافظين. كل الأمور دي انخفضت – من وجهة نظرنا- بمستوى الفيلم. والحقيقة كنا متوقعين اختلاف (كيفي) للكوميديا مش الاكتفاء بتقديم (كمية) كوميدية كبيرة وخلاص.
ويل فاريل و جون سي رايلي بيقدموا أداء جيد. لكن أداء معتاد منهم. واعتمدوا بشكل كبير على الأداء الجسدي واللفظي لتوصيل الكوميديا بتاعتهم. بعيدا عن الكوميديا المتولدة من المواقف نفسها. وده كان من عيوب الفيلم.
ايتان كوهين مخرج ومؤلف الفيلم اعتمد على شهرة الأبطال في المقام الأول علشان يقدم فيلم مضمون النجاح. وشوفنا ايتان قبل كده مخرج لفيلم Men in Black 3 وبشكل عام التكتيك الإخراجي له محتاج بعض التعديلات علشان يقدر يقدم أنماط مختلفة من الكوميديا.
Holmes & Watson فيلم كوميدي لطيف نرشحه للمشاهده في الويك اند. لكن بدون توقعات لأكتر من الكوميديا المعتاده للنوعية دي من الأفلام.