Upgrade : تحب تبقى انسان الي؟
فكرة إن أنسان عادي يتحول لإنسان ألي ممكن تكون مغرية لكتير من الناس. مافيش ألم ومعدل قوة وسرعة عالي. أي واحد ممكن يفكر ازاي يستغل الإمكانيات الجديدة اللي ممكن تعود عليه من تحوله لإنسان ألي وهو ده اللي فكر فيه بطل الفيلم لوجان مارال جرين أو جراي تريس اللي بيتعرض لحادث في عالم المستقبل – المُسيطر عليه بالألات والتقنية الحديثة- وبعد تعرضه للحادث بيُعرض عليه أن يتم حقنه بشريحة الكترونية تحوله لإنسان ألي قادر على القتال. وبيبدأ يستغل الإمكانيات الجديدة في الإنتقام. لكن هل هايقدر يحقق هدفه فعلا؟
الأداء التمثيلي في الفيلم كان مميز وقوي جدا. لوجان جرين في دور البطولة قدر يقدم لنا أداء حركى مدهش. وده طبعا كان بناء على توجيهات المخرج لاي وانيل اللي قدر يستغل الحبكة والقصة الجديدة علشان يتلاعب بينا على مدار حوالي ساعتين.
الموسيقى التصويرية كانت من الأمور اللي لفتت أنتباهنا بقوة في الأحداث. وعجبنا توظيفها بطريقة مُلهمة بحيث تكون جزء من الأحداث مش مجرد عنصر مساعد لها.
في الربع الأخير من الفيلم بنحس أن الأحداث تحولت من الأكشن والمغامرة الى الفلسفة والتراجيديا. ده كان كويس بالنسبة لنا لكن مش هايكون كويس بالنسبة للمشاهدين اللي بتتأثر بسهولة وسرعة. لأن الفيلم بالقرب من النهاية بيحمل لنا عبء نفسي حسينا اننا كنا في غنى عنه.
عجبنا مناقشة الفيلم لجانب فلسفي مهم هو توغل الألات في حياتنا وهل ده مفيد ولا لا. وهل من الجيد أن تبقى التقنية والتكنولوجيا متحكمة في كل تفاصيل حياتنا؟ ده اللي هانعرفه من خلال أحداث Upgrade
