كازانوفا : فين المواهب الشابة في مصر؟!
في فترة من فترات الفن في مصر. جيل الشباب كان مكون من أسماء زي أحمد زكي ومحمد صبحي وعادل امام ومحمود السعدني وغيرهم من الفنانين اللي شكلوا الفن في مصر في السنوات اللي بعد كده. هل احنا اليوم عندنا مواهب شابه بحجم المواهب الشابة في الفترة الماضية؟
فيلم كازانوفا بيلقي بعض الضوء على شكل مواهب الشباب في مصر. للأسف الشديد مش شايفين أي مواهب شابه واعده ممكن تشيل راية الفن في الفترة القادمة. وده واضح من فيلم زي كازانفوفا مش بيقدم أي جديد على المستوى الفني أو حتى الإنتاجي.
كازانوفا بيحكي عن قصة حب بين مصممة أزياء ومخرج إعلانات. لكن قصة الحب بتتعرض لمواقف كتير بتغير مجرى الأحداث بشكل كبير مع تطور القصة بشكل مش عاوزين نحرقه على المشاهدين.
على الرغم من ان ايساف ورانيا البحيري من المواهب الشابة اللي بنحط عليها أمال كبيرة. لكن مستواهم في الفيلم كان اقل من توقعاتنا بنسبة كبيرة. ومن هنا حسينا أن المشكلة الأساسية في إخراج الفيلم على يد أسامه فاضل خاصة ان الفيلم يعتبر التجربة الأولى له بعد أعمال كتير اشتغل فيها كمخرج منفذ زي مسلسل هي ودافنشي و مسلسل بره الدنيا.
من الأدوار الجيدة في الفيلم دور الهام عبد البديع. والحقيقة الهام ممثلة قوية قدرت تثبت نفسها في أكتر من عمل زي كأنه أمبارح و الزيبق وغيرها من الأعمال
كازانوفا مش فيلم استثنائي. ولو في حاجه بيؤكدها الفيلم ده. بيأكد على ضرورة اهتمامنا بتأسيس جيل من الفنانين الشباب اللي – المفروض- هايكونوا رواد الفن في المستقبل القريب.
