Extremely Wicked, Shockingly Evil, and Vile : فيلم تشوفه على مسئوليتك الخاصة!
قصة حياة السفاح الأمريكي الشهير تيد بوندي هي واحدة من أغرب وأعقد القصص. بل وأكثرها عنف ودموية ممكن نشوفها في حياتنا. قصة الرجل المهندم الوسيم اللي لف الولايات الأمريكية بالكامل تقريبا علشان يرتكب فيها مجموعة من أبشع جرائم الأغتصاب والقتل. ودوخ المباحث الفيدرالية وراه لفترة طويلة. ثم هرب من السجن مرتين!
فيلم Extremely Wicked, Shockingly Evil, and Vile مش المحاولة السينمائية الأولى لتقديم القصة، لكن واحدة من العلامات المهمة اللي لازم نقف أمامها لما نتكلم عن واحد من أكثر الشخصيات اللي تم تقديمها في السينما والمسلسلات بشكل عام.
الأداء التمثيلي لزاك ايفرون في دور تيد بوندي كان أكثر من رائع. زاك قدر يتقمص الشخصية بشكل غير عادي. ومن أهم الأمور اللي ساعدته على دوره هو أن تيد بوندي كان حديث الساعة لوقت طويل في أمريكا وله مقاطع فيديو طويلة وهو بيتكلم. لكن بقدر ما ده ممكن يسهل مهمة الممثل بيصعب دوره أمام المشاهدين لأنهم بيقارنوا طوال الوقت بين الأصل والتمثيل.
مستوى الدموية والعنف – وبعض المشاهد اللي لها طابع جنسي- كان عالي. علشان كده بنقول لكم مشاهدة الفيلم ده تكون على مسئوليتكم الخاصة لأن الفيلم مش مناسب لكافة الأعمار وممكن يسيب ذكريات مش كويسة للناس اللي بتتأثر بسرعة.
