فيلم Arbitrage : فساد الأغنياء
عالم فساد العاملين فى مجال المال والأعمال، والقصص السرية والأسطورية حولهم هى محور الفيلم الهوليودى اللى ساهم فى إنتاجه أحد الشخصيات السعودية الهامة، فى واحدة من مظاهر دخول العرب فى المجال السينمائى الهوليودى.
الفيلم أخرجه نيكولاس جاريكى وقام ببطولته تيم روث وسوزان ساندرون بالإضافة طبعًا للعبقرى ريتشارد جير اللى شوفناه فى أكثر من عمل رائع مؤخرًا وبـ يحكى عن رجل أعمال بـ يحاول يدارى مشاكله المالية وبـ يتم اتهامه بقتل عشيقته فـ يبدأ رحلة طويلة لإثبات برائته، ثم تتوالى الأحداث.
الإضاءة وزوايا التصوير لعبت دور مهم فى إظهار الأحداث بشكل قوى وحماسى، كمان أحداث الفيلم كانت مشوقة ومتسارعة، لاحظنا الانتباه الكامل على كل وجوه المتابعين فى قاعة العرض، كمان استعمال مشاهد الزوم على وجوه الممثلين ساعدت على إظهار تفاصيلهم ومعرفة المشاهدين لكثير من الأمور اللى بـ يفكروا فيها، وكان أسلوب مختلف من أساليب التصوير اللى ساهم بإيجابية فى الأحداث.
ريتشارد جير، ابن الخمسينات، واحد من أهم وأكبر الممثلين فى هوليود قدر يقوم بدوره باحترافية كبيرة ويشدنا بملامحه الهادئة فى كثير من الأحيان للاستمرار فى المتابعة للحظة الأخيرة.
Arbitrage فيلم ننصحك بمشاهدته بهدوء وتمعن، ده مش فيلم تشوفه مع باكيت فيشار فى الويك إند.
