خمس أسباب تخلينا منتظرين الفيل الأزرق2 على أحر من الجمر
من اللحظة الأولى اللي تم اصدار التريلر التشويقي لفيلم الفيل الأزرق الجزء الثاني أصبح ترند على مواقع التواصل الأجتماعي. لكن انتظارنا للفيلم وتحمسنا له بدأ من مجرد الإعلان عن بدء تصوير الفيلم. تعالوا نعرف ليه.
1: فريق العمل
فريق عمل الفيلم واعد جدا وبيخلينا نتوقع مستوى غير عادي للفيلم. بنشوف أحمد مراد في التأليف و مروان حامد في الإخراج. الدويتو ده مش بيخيب تقريبا. وكل الأفلام اللي قدمها قوية جدا ومميزة (الفيل الأزرق – الأصليين- تراب الماس) وواضح الكيمياء بينهم مميزة ومستمرة في الفيل الأزرق 2. وبنشوف في الجزء الثاني كريم عبد العزيز في البطولة مع هند صبري ونيللي كريم ومن الواضح أن كل الأبطال قايمين بأداء غير عادي لأدوارهم
2: الجزء الأول وهمي
الجزء الأول من الفيلم المبني على رواية أحمد مراد اللي بتحمل نفس الإسم كان واحد من أحلى الأفلام اللي شوفناها. مباراة في التمثيل بين كريم عبد العزيز وخالد الصاوي. وأداء قوي من نيللي كريم ومستوى رائع من الديكورات والموسيقى التصويرية. حتى أننا فاكرين الاقبال الجماهيري على الفيلم والوسايط اللي كان الجمهور بيعملها علشان يحصلوا على تذكرة سينما للفيلم.
3: المؤثرات الخاصة
من اصدار الجزء الأول كان واضح اهتمام صناع الفيلم بالمؤثرات الخاصة والخدع السينمائية. وواضح من تريلر الجزء الثاني أن نفس الاهتمام مستمر والمؤثرات مستمرة في لعب دور رئيسي في الفيلم. دي حاجه مش بنشوفها كتير في الأفلام العربية.
4: التريلر تحفة
https://www.facebook.com/watch/?v=2368417613372247
نادرا ما شوفنا تريلر فيلم عربي بالحلاوة دي. مونتاج مظبوط ومشاهد تم اختيارها بعناية علشان تشوقنا للمشاهدة بدون حرق أحداث مهمة. موسيقى حلوة جدا وقطعات سريعة على مشاهد كتير. كل دي حاجات تخلينا منتظرين الفيلم بحماس شديد. مش احنا بس.. التريلر عمل حوالي 4 مليون مشاهدة في حوالي 12 ساعة فقط!
5: موسم إصدار الفيلم
تعودنا في السنين الأخيرة أن موسم عيد الأضحى أصبح موسم الأفلام القوية والتقيلة. وهو الموسم المفضل لأحمد مراد ومروان حامد علشان يقدموا لنا ابداعاتهم. هل ده اللي هايحصل السنة دي؟ مستنيين رأيكم في الكومنتات.
