Polaroid : صورة الكاميرا ممكن تقتلك!

فكرة الكاميرا اللي بتقتل الناس أو المسكونة بروح شريرة مش فكرة جديدة. بالعكس الفكرة دي ظهرت مع بداية اختراع الكاميرا، لما كان أهل القبائل الغير متحضرة بيكرهوا التصوير ومعتقدين أن الكاميرا بتخطف روحهم.

لكن فيلم Polaroid مش بيحكي عن  الفكرة الكاميرا القاتلة بشكل مجازي. لكن الفيلم بيحكي عن كاميرا مسكونة بكيان شرير بتحصل عليها بيرد فيشر (قامت بالدور كاثرين برسكوت) وبتبدأ تصور أصحابها وهي مش عارفه ان كل صورة بتاخدها بتحكم على صاحبها بالموت. هل هاتقدر توقف اللعنة دي؟

فكرة الفيلم تعتبر جيدة وكتابة السيناريو كانت قوية لكن اخراج لارس كليفبرج كان ضعيف لانه اعتمد في المقام الأول على المؤثرات الخاصة علشان يقدم الكيان او الشبح اللي بيقتل الضحايا. واستخدام التقنية في الفيلم كان فقير وضعيف جدا لدرجة بتجعل بعض المشاهد مضحكة مش مرعبة!

الأداء التمثيلي لأبطال الفيلم كان جيد وحاولوا قدر الإمكان يقللوا من ضعف المؤثرات الخاصة من خلال تعبيرات الوجوه المرعوبة وحركة الجسد. لكن فكرة أننا مش عارفين أصلا ايه هو الكيان الغامض اللي بيقتل الضحايا (هل هو روح ساكنة الكاميرا أو شيطان..الخ) دي كمان كانت نقطة ضعف قللت من شعورنا بالاثارة

Polaroid فيلم رعب هايعجب المشاهدين اللي عندهم سعة صدر انهم يتغاضوا عن المؤثرات الخاصة الغير متقنة واللي عاوزين يعيشوا جو رعب بيستدعيه فلاش الكاميرا!