The Croods: عن الحرية والتحرر
بـ يعجبنا فى أفلام هوليود الموجهة للأطفال أو للمشاهدة العائلية بشكل عام أنهم بـ يطعموا المغامرة المجنونة بعدد كبير ومهم من الرسائل المستخبية فى إطار المغامرة، الرسائل اللى بـ تواجه العقل الباطن وتعيد “برمجته” على حاجات جديدة وجميلة، وده اللى بـ يخلى أفلام هوليود للأطفال ملائمة للكبار والصغار على حد سواء، وهنا يكمن الإبهار الحقيقى.
من تأليف كريس ساندرز، وكيرك دي ميكو ومن إخراج كريس ساندرز بـ نشوف على مدار حوالى 100 دقيقة من المتعة والإثارة رحلة عائلة كرودز لاكتشاف ما هو غير مكتشف فى حياتهم التقليدية البسيطة بعد اضطرارهم للهجرة والخروج من كهفهم الضيق المظلم لرحاب الغابات حيث المناظر الطبيعية الخلابة والمغامرات اللى مش بـ تنتهى من الدقيقة الأولى للفيلم وحتى نهاية أحداثه.
نقدر نقول أن الشخصية المحورية للأحداث هى شخصية “أيب” (إيما ستون) اللى بـ تحلم بالحرية والانطلاق لكن تقاليد العائلة وخوفهم غير المبرر من تجربة أى شىء جديد بـ يكبتها وبـ يوقف طوفان أحلامها من الاندلاع فى كل مكان، إلى أن تأتى الفرصة من خلال اضطرار العائلة للخروج من الكهف وخوض المغامرة بما فيها من خوف ومخاطر… وإثارة ومتعة واكتشاف كل ما هو جديد.
الإبهار من المشهد الأول كان دستور كل القائمين على العمل الرائع ده، ساعدهم على ده تقنية الـ 3D اللى حسينا أنها لأول مرة منذ عدد كبير من الأعمال يتم توظيف إمكانياتها بالكامل لصالح العمل، وما كانش مجرد بوستر بـ يتم كتابته لإجبار المشاهدين على دفع ثمن تذكرة أعلى مقابل جودة مشابهة للعروض العادية، بل على العكس، لو ما كانش الفيلم اتعرض بتقنية 3D كان هـ ينقصه عامل مهم جدًا من عوامل الإبهار.
الجميل كمان فى الفيلم أنه يصلح للمشاهدة العائلية من كل الأعمار، رغم أن فيه مشهد أو اثنين قد يكونوا مخيفين، إلا أن الفيلم فى الإطار العام ممكن تسيب أمامه أولادك وأنت مطمئن تمامًا أن مافيش أى حاجة ممكن تعكر صفو طفولتهم البريئة، الأمر اللى أصبح نادر فى كثير من الأعمال السينمائية حتى اللى بـ يتم تقديمها للأطفال.
هـ تخرج من The Croods وأنت مشحون بشحنة جميلة من الإيجابية والرغبة فى عمل أى شىء جديد وفيه مخاطرة فى حياتك، ودى كانت رسالة صناع الفيلم لكل مشاهديه، أن الحياة فيها من الإثارة والخيال اللى يخليها تستحق أنك تمشى فى طرق ما مشيتش فيها قبل كده، وتجرب أمور ما جربتهاش قبل كده… تفتكروا ممكن فيلم Animation يقدر يغير طريقة تفكيرنا وحياتنا إلى هذا الحد؟
شوفوا الفيلم وارجعوا اكتبوا لنا تعليقاتكم عن التجربة السينمائية المختلفة.. The Croods.
