The Hustle : يا نساء العالم.. انصبوا على الرجالة!
المسيرة الفنية لنجمة هوليود ريبيل ويلسون تعتبر تكرار مستمر لنفس التيمات اللي بتقدمها في معظم أفلامها. والغريب أننا لحد دلوقت مش بنزهق من التكرار ده لأنها قادرة طوال الوقت على أعادة تقديم الايفيهات الكوميدية بطرق مختلفة مهما كانت قديمة.
في The Hustle بنشوف ريبيل ويلسون بتلعب شخصية نصابة متمرسة في النصب على الرجال، لكن بسبب بعض التعقيدات في عمليتها بتضطر تسافر فرنسا علشان تتعرف على آن هاثاواي النصابة المحترفة اللي بتاخد عمليات النصب الخاصة بها لمستوى جديد تماما وأعلى بكتير.
لما بنتكلم عن ريبيل ويلسون والكوميديا اللي بتقدمها، في الغالب بتعتمد في معظمها على المواقف الكوميدية اللي بتطلع من التناقضات بين شخصيتها المهرجلة العنيدة الفاشلة مقارنة بشخصية تانية اكتر جدية واحترافية – آن هاثاواي في حالتنا- والحقيقة أن الكوميديا اللي خرجت من المفارقة دي كانت عظيمة على الرغم من تكرارها.
لكن من ناحية تانيه حسينا بفجوة كوميدية خاصة في النصف الأخير من الفيلم، وحسينا ان اخراج كريس أديسون فقد تركيزه على المهمة الأساسية للفيلم وهي الكوميديا لحساب خيوط فرعية تانيه ضعيفة. وده اثر على تقييم الفيلم بالكامل.
وبما اننا بنتكلم عن كوميديا بتقدمها ريبيل ويلسون نقدر نقول ان المشاهدين المحافظين مش هايعجبهم بعض المشاهد أو التلميحات في الفيلم والفيلم بيعرض في تصنيف +16 في مصر و PG-13 في أمريكا.
The Hustle فيلم كوميدي نسائي بالمقام الأول مش بيقدم حبكة معقدة وننصح بمشاهدة لعشاق ريبيل ويلسون أو اللي عاوزين يفضوا دماغهم مع فيلم كوميدي خفيف بدون توقعات كبيرة.
