Yesterday : يحصل ايه لو العالم بدون فريق (بيتلز)!
على الرغم من الشهرة الكبيرة اللي حققها فريق البيتلز والأغاني اللي غيرت شكل الغناء في العالم، لكن الأثر الكبير ليهم كان في أمريكا اكتر من باقي دول العالم. خاصة أننا كنا في فترة مافيهاش سوشيال ميديا أو أنترنت. لكن ده لا ينفي أن كتير من الناس حوالين العالم من عشاق فريق البيتلز حتى اليوم.
الناس دي هي اللي ممكن تتاثر بفيلم بيتتبع حياة مطرب متوسط الشهرة (هيمش باتل في دور جاك مالك) لحد ما بتحصل له حادثة وبيجد نفسه لما بيفوق في عالم مايعرفش فريق البيتلز ولا اغانيهم. ومن هنا بيبدأ يستغل الأغاني والتاريخ الموسيقي الضخم لهم علشان يحقق شهرة سريعة في وقت قياسي.
الأداء التمثيلي لهيمش باتل و ليلي جيمس في دور ايلي كان رائع، وساعدهم الكتابة المتميزة لـ ريتشارد كيرتس اللي قدر يقدم قصة قوية للسينما اعتمادا على قصة جاك بارث.
لكن بيعيب الفيلم من وجهة نظرنا ان مرور المخرج داني بويل على أغاني البيتلز كان سريع ومش بيسرد التاريخ الغنائي لأهم فرقة في العالم تقريبا. واستغربنا من فيلم المفروض انه بيركز على الأغاني في المقام الأول ان يكون مروره عليها سريع ومش متعمق بالقدر الكافي.
لكن من ناحية تانية الديكورات وزوايا التصوير والموسيقى التصويرية كانت قوية ومتوظفه كويس في الفيلم بشكل ممتع.
لو كنت من محبي الكلاسيكيات الأمريكية في الغناء فيلم Yesterday بيقدم جرعة جيدة ومناسبة، مع قصة رومانسية بتتطور مع الأحداث بشكل جيد. لكن لو داخل الفيلم علشان البيتلز فقط ممكن جرعة الأغاني مش هاتكون كافية لك كمشاهد متخصص.
