Judy: كواليس عالم الفن.. مش دايما مبهرة
مع اقتراب شهر فبراير. شهر اعلان جوائز الأوسكار. بنشوف أفلام كتير مقتبسة عن قصص حقيقية في محاولة لجذب انتباه لجنة التحكيم في الاوسكار المعروف عنها انحيازها للأفلام المعتمدة على قصص حقيقية. Judy يعتبر من الأفلام دي.
Judy بيحكي عن الفنانة الأسطورية جودي جارلاند في فترة صعبة من فترات حياتها. لما فلوسها بتبدأ تقل وبتبدأ الأضواء تنحسر من حواليها. الأمر اللي بيخليها تاخد قرار صعب أنها تسيب أطفالها في أمريكا وتنطلق في جولة فنية في بريطانيا.
Judy بيلقي نظرة قاتمة شوية على عالم صناعة السينما والغناء. وازاي بمجرد ما تنحسر الأضواء والشهرة عن الفنان بيبدأ يعاني نفسيا وماديا بشكل كبير. وازاي بعض الأعمال الفنية اللي بنشوفها بشكل مبهر على الشاشة بيكون وراها معاناة وضغط نفسي وعصبي كبير. وده بنشوفه بوضوح في مشاهد بدايات جودي.
أحلى ما في الفيلم من وجهة نظرنا هي حالة التجسيد الأكثر من رائعة للفنانة رينيه زيلويجر في دور جودي. مانقدرش نقول أن اللي شوفناه كان تمثيل. لكن كان معايشة وتطابق كاملين بين رينيه وبين الشخصية اللي بتأديها. ومن الواضح أن رينيه زيلويجر هاتكون لاعبة أساسية معانا في ملعب الأوسكار.
كمان الأغاني والموسيقى التصويرية للفيلم كانت رائعة. وتم توظيفهم بشكل ممتاز لخدمة السيناريو. لكن من ناحية تانيه إيقاع فيلم Judy كان بطئ ورتيب. ومانقدرش نقول أن الفيلم بيقدم قصصة متتابعة سريعة الأحداث. لكن على العكس بيقدم عدد قليل من الأحداث لكن بيسيبها تنضج على نار هاديه جدا. وده مش هايكون مناسب لعدد كبير من المشاهدين.
لو مهتم بكواليس العمل في عالم الفن وعندك بال رايق وصبر. فيلم Judy هايكون مناسب لك خاصة مع الأداء الاستثنائي من رينيه زيلويجر
