Haunt : الإخراج ضعييييف!

بعض الأفلام بيكون عندها كل عوامل النجاح لكن في النهاية مش بتنجح. لما بنشوف الحالة دي قدامنا بنعرف أن إما القصة ضعيفة أو الإخراج مش قادر يستغل عناصر النجاح علشان يقدم فيلم ناجح. وهو ده اللي حصل في فيلم Haunt

Haunt بيحكي عن مجموعة من الأصدقاء بيقرروا يشاركوا في تجربة مختلفة في أحد بيوت الرعب. التجربة بتبدأ في الأول على أنها تجربة بسيطة لوقت محدد. لكن مع الوقت بتتحول لصراع وسباق للبقاء على قيد الحياه.

على الرغم من أن تيمة الفيلم وقصته مش جديدة. لكن تنفيذ الفيلم على الشاشة كان ممكن يكون أقوى. ومن هنا نعرف أن إخراج الفيلم للمخرج بريان وودز و سكوت بك كانوا مشتتين أثناء اخراج الفيلم. حتى أننا بنناخد وقت علشان نفهم هل الفيلم بيتكلم عن قاتل متسلسل ولا كيان خفي زي الأشباح والأرواح.. والفرق بينهم كبير.

لكن أحلى حاجه في Haunt من وجهة نظرنا كانت الأداء التمثيلي من أندرو كالدويل و صامويل سي هانت و شازي راجا وباقي أبطال الفيلم. خاصة أن السيناريو كان مهتم يعرفنا تفاصيل وخلفية بعض الأبطال بالتالي حسينا ببعض التعاطف معاهم لما بدأ الرعب. لكن طبعا الفيلم مكانش عنده الوقت الكافي أنه يدينا خلفية نفسية لكل واحد من أبطال الفيلم.

Haunt فيلم مش أحسن قصة ولا أحسن تمثيل. لكن لو كان الإخراج أقوى كان ممكن الفيلم يتنقل نقلة تانيه خالص