Gemini Man : تعمل ايه لو قابلت نسخة منك؟!
هل سألت نفسك قبل كده تعمل ايه لو تم استنساخ نسخة منك في المستقبل وقدرت تقابلها وتتكلم معاها؟ البعض ممكن يفرح لو كانت مهنته تقليدية ومملة علشان هايقدر يبعت نسخته للشغل ويستمتع هو. لكن لو كانت شغلتك هي القتل والتدمير.. لازم تعيد حساباتك.
Gemini Man بيحكي عن عميل من نوع خاص. محترف في القتل والتدمير وبيعمل لصالح الحكومة. لكن بعد استقالته من العمل واستمتاعه بحياة التقاعد بيكتشف أنه تم استنساخ نسخة منه علشان تدور عليه وتقتله. الأمر اللي بيضعه في مقاومة نسخة منه في كل أفعاله وقادرة على استنتاج كل تصرفاته.
فكرة مقابلة الإنسان مع نفسه فكرة فلسفية بالمقام الأول. ولما نضعها في فيلم أكشن لازم ناخد بالنا أن الأمور ما توصلش لدرجة السطحية ولا نقدم فيلم معقد ومستعصي على الفهم في نفس الوقت. Gemini Man أنحدر بالفكرة وسطحها بدرجة كبيرة.
إخراج أنج لي للأحداث كان ضعيف ومش موزون. وماقدرش يقدم رؤية فلسفية ولا حتى فيلم أكشن قوي، لأن المؤثرات الخاصة كان لها دور كبير في اخراج مشاهد الأكشن وتسببت في خروج بعض المشاهد بشكل مش مفهوم وسريع زيادة عن اللازم والمشاهدين حسوا بده.
لكن من ناحية تانيه الأجواء المستقبلية اللي تم التصوير فيها كانت جيدة، وتضافرت مع أداء ويل سميث ومكياج الشخصية علشان يقدموا لنا في النهاية بعض الأحداث الجيدة اللي تخلينا نسأل نفسنا هانعمل ايه لو كنا مكان البطل.
أضعف نقطة في الفيلم كانت الحوار الغير موظف بشكل صحيح واللي بعض الجمل فيه كانت أطول من اللازم وحسينا أن الحوار لو كان أقصر كان هايكون أفضل خاصة أننا بنتكلم عن فيلم أكشن مش عن فيلم حواري.
Gemini Man فيلم يصلح للمشاهدة في وقت الظهيرة بنصف اهتمام أو اثناء تناول الطعام. أو لو كنت من عشاق ويل سميث اللي بيشوفوا في كل فيلم بيقدمه حالة من العبقرية والتميز.
