Official Secrets : الكواليس السرية لحرب العراق
الناس اللي بتحب أفلام المخابرات والتجسس وكواليس الحروب وعالم السياسة هاتقدر فيلم Official Secrets قوي. لأنه بياخدهم في رحلة لعالم ما قبل حرب العراق وازاي كانت بتدار الأمور وراء الكواليس في الفترة دي.
Official Secrets المقتبس عن قصة حقيقية، بيحكي عن المترجمة البريطانية (كاثرين جان) واللي قامت بدورها (كيرا نايتلي) واللي بتسرب معلومات عن تعاون مخابراتي مشترك بين أمريكا وبريطانيا للضغط على الدول التانيه للتصويت لصالح ضرب العراق.
على الرغم من أن موضوع الفيلم سياسي استخباراتي بالدرجة الأولى، لكنه بياخدنا في رحلة نفسية إنسانية عميقة. بشكل يخلي ناس كتير مننا تسأل نفسها هل لو كانت في نفس الظروف كانت هتعمل نفس الاختيارات اللي بيختارها أبطال الفيلم؟
الترابط ده. والوحدة في الشعور بين المشاهدين وابطال الفيلم كان مستحيل يحصل منغير الإخراج المتميز لـ جافن هود والأداء التمثيلي الأكتر من رائع من كيرا نايتلي. والثنائي ده هو السبب الأساسي لنجاح الفيلم من وجهة نظرنا.
والغريب – والممتع في نفس الوقت- أن قدرة المخرج جافن هود في لمس مشاعرنا كمشاهدين من خلال إخراجه خلاه ماينساش يقدم كادرات جيدة جدا وحركة كاميرا سلسة ومفهومة وفي نفس الوقت قادره تخدم الفيلم كويس. وكل دي أمور تحسب له.
بننصحكم لو عاوزين تتفرجوا على Official Secrets بمتعه أكبر. تقروا أكتر عن حرب العراق وكواليسها قبل الدخول في تفاصيل الفيلم. أما لو كنتم مش بتحبوا الأفلام اللي فيها كلام كتير عن السياسة والمخابرات فا Official Secrets مش هايكون مناسب لكم
