Light of My Life : هاتعمل ايه لو مكان البطل؟!
الدراما اللي بتصور البقاء على قيد الحياة بتنجح بس لو عرف السيناريو يخلي المشاهد يسأل نفسه طول الوقت: هعمل ايه لو كنت مكان البطل؟!
في Light of My Life مش بس بنشوف تيمة البقاء على قيد الحياة، إحنا كمان بنشوف الكوكب بعد ما تعرض لوباء قتل أعداد ضخمة من الناس. ورحلة أب وبنته (كيسي افليك و آنا بنوفسكي) للأنتقال من الثلوج والبرد للدفء والراحة. لكن الرحلة دي مليانه سلسلة لا تنتهي من المفاجأت.
الجميل في الفيلم أنه صالح للمشاهدة على أكتر من مستوى. المستوى الأول هو مستوى المغامرة والأكشن واللي بيتفرج على الفيلم للغرض ده هايعجبه الفيلم عموما وخصوصا الثلث الأخير منه واللي مستوى العنف زاد فيه لدرجة كبيرة.
أما اللي عاوز يشوف الفيلم من زاوية مشاهدة تانيه عن أب بيعيد استكشاف علاقته ببنته من خلال محاولة النجاة من وباء خطير. برضو الفيلم هايكون صالح للمشاهدة من المنطلق ده. ودي المنطقة اللي حبينا نشوف الفيلم منها.
كيسي أفليك نجح كمخرج ومؤلف وبطل للفيلم. وواضح انه كان واخد الفيلم كتحدي شخصي بالنسبة له. والصراحة انه نجح في التحدي وقدم أداء تمثيلي اكتر من رائع ويحسب له. وطبعا لا يمكن ننسى أداء آنا بانيوفسكي اللي كان لا يقل روعة عن أداء كيسي.
فيلم Light of My Life فيلم قوي ويستحق المشاهدة من أنماط مختلفة من المشاهدين. كل واحد منهم هايشوف في الفيلم زاويه تناسبه!
