Spies in Disguise : ويل سميث أصبح… حمامه!
مانقدرش ننكر حبنا لأفلام الجاسوسية بشكل عام. خاصة اللي بيكون فيها Line كوميدي يكسر حدة الأحداث. لكن لو اضفنا لكل ده أن الفيلم يكون فيلم أنيميشن وكمان من بطولة فنان مميز زي ويل سميث هانكون أمام فيلم قوي جدا هو Spies in Disguise
Spies in Disguise بيحكي عن اخطر جاسوس في العالم واللي بيتحول لحمامه – بطريقة مش عاوزين نحرقها عليكم- علشان يقدر ينجح في المهمة اللي بيقوم بيها واللي هايتوقف عليها مصير العالم!
مبدئيا لازم نقول أن Spies in Disguise قدم مستوى جيد على صعيد الرسومات وتحريك الشخصيات على الشاشة. وعجبنا فكرة أن شخصيات الفيلم تكون متناسبة مع صوت وشكل المثلين الأصليين (خصوصا ويل سميث و توم هولاند) وده ساعدنا على تصور الأداء الصوتي وتقربنا من الشخصية أكتر.
وبما أننا بنتكلم عن الأداء الصوتي. وعلى الرغم من أن أختياراته الأخيرة مش أحسن حاجه في السينما لكن ويل سميث قدر يقدم دور جيد ويقنعنا بأداؤه. وطبعا توم هولاند هو كمان عمل دويتو سينمائي تمثيلي جيد جدا.
لكن من ناحيه تانيه الفيلم مكانش قادر يحدد هو بيتوجه لأي جمهور بالظبط. وبعض الايفيهات في الفيلم حسينا انها لفئة عمرية أكبر شوية. والفئة العمرية دي ماكانش فيه حاجات تانيه تخدمها طوال مدة الفيلم. بالتالي حسينا ببعض التضارب في السيناريو وطريقة توجيهه للمشاهدين.
Spies in Disguise فيلم انيميشن حلو ومتعوب عليه وننصحكم بمشاهدته بدون احكام مسبقة ممكن تفسد عليكم تجربة المشاهدة.
