Onward : رحلة البحث عن.. السحر!
لما نتكلم عن اجتماع شركات بحجم بيكسار وديزني لانتاج عمل مشترك. النتيجة لازم تكون مبهرة وقوية الى اقصى حد. لكن اللي شوفناه في Onward كان عمل شبه متكامل على كل الأصعدة
Onward بيحكي عن أخين يتامى بيحصل واحد منهم على هدية من أمه، وهي عصاية سحرية بتديله القدرة على استرجاع والده لمدة يوم واحد بس. لكن علشان يتم السحر بشكله الصحيح بيدخل الأخين في مغامرة طويلة للحصول على جوهرة، بتجبرهم على العودة لعالم السحر من جديد.. مش عاوزين نحرق عليكم تفاصيل القصة أكتر من كده
المخرج دان سكانلون قدر يقدم أفضل ما عنده علشان يقدم لنا في النهاية صورة مبهرة وتحريك رائع للشخصيات. وطبعا الفضل هنا مش للمخرج بس. لكن للأمكانيات الإنتاجية الهائلة لبيكسار وديزني. وخبرتهم الطويلة في صناعة أفلام الانيميشن.
الجميل في Onward أنه مش بس بيقدم مغامرة جميلة للصغار. لكن رسائل خفية للكبار كل ده بتغليف أنيق من الألوان المبهرة اللي بتسرق عيوننا، والأداء الصوتي المميز من كل ابطال الفيلم تقريبا.
والجميل في Onward انه مش بيعزف على الأوتار المعتادة لديزني أو بيكسار. لكن بيحاول يكسر القوالب دي ويقدم تيمته الشخصية حتى لو خرج عن الاطار المتوقع له. للأسف مش هانقدر نشرح النقطة دي أكتر من كده علشان مانحرقش الأحداث على المشاهدين لكن لما تشوفوا الفيلم هاتفهموا احنا نقصد ايه.
ولأن الحلو ما يكملش كان نفسنا Onward يكون مطعم بأغاني واستعراضات وموسيقى تصويرية قوية علشان يكون عمل متكامل.
Onward فيلم انيميشن ممتاز بميزانية كبيرة ومشاهد ممتعة وألوان متفجرة. لو كان شريط الصوت أكثر ابهارا كان ممكن نعطيه خمس نجوم كاملة في تقييمنا.
