Bad Boys for Life : الجزء الثالث أضعف بكتير من الأجزاء السابقة
لما بتقدم جزء أول من فيلم ما، كل حاجه بتقدمها بتكون مبهرة وجديدة. ولما بتعمل جزء ثاني بيكون عندك فرصة ثانية تقدم شوية إبهار جديد. لكن مع الجزء الثالث من سلسلة Bad Boys واللي بييجي باسم Bad Boys for Life تقريبا كانت كل عوامل الإبهار انتهت خلاص!
Bad Boys for Life بيحكي عن المحقق بارنيت ولوراي (مارتن لورانس وويل سميث) اللي بيعودوا للعمل مع بعض من تاني، في محاولة للتغلب على قاتل محترف عاوز يقتلهم انتقاما منهم بسبب أحداث سابقة. وفي طريقهم لحل القضية بيحلوا كمان مشاكلهم الشخصية.
Bad Boys for Life حاول يخلق أحداث فرعية كتير علشان يحلها أثناء سير سيناريو الأحداث. لكن محبي النوعية دي من الأفلام بيكونوا عاوزين أقل قدر من التعقيد وأكبر قدر من الأكشن والكوميديا. وهي دي الحاجات اللي ماقدرش المخرجين بلال فلاح و عادل العربي – وهم مخرجين من أصل مغربي بالمناسبة- أنهم يقدموها.
مستوى الأكشن والمؤثرات الخاصة في الفيلم كان جيد، لكن مش بنفس المستوى اللي شوفناه في الجزء الأول والثاني. وحسينا أن السيناريو كان حاطط عبء الأكشن على ويل سميث والكوميديا على مارتن لورانس. لكن الكيمياء بين الاثنين مكانتش كويسة.
الأداء التمثيلي في الفيلم مكانش كويس، حتى الكوميديا في الفيلم مكانتش بالمستوى اللي كنا متوقعينه. وطول الوقت كنا بنقارن بين الفيلم وبين الأجزاء السابقة اللي أخرجها مايكل باي واللي أي جزء منها يضرب Bad Boys for Life بالنار!
أخيرا.. فيلم Bad Boys for Life تشوفه بدون توقعات مسبقة وبدون مقارنة مع الأجزاء السابقة من نفس السلسلة وإلا النتيجة مش هاتكون لصالحه.
