A Hidden Life: هاتقدر تقول “لا” في وش الظُلم؟
لما بنفكر في فترة سيطرة النازية على أوروبا. كنا بنفكر هل كان فيه ناس عارضت الظلم والقتل ده؟ هل فيه ناس قررت تقول “لا” بصوت عالي مهما كان الثمن؟ فيلم A Hidden Life بيحكي قصة واحد من الناس اللي قالت “لا”
A Hidden Life بيحكي عن القصة الحقيقية للنمساوي فرانز ياجيرشتاتر اللي رفض الخدمة في الجيش النازي في فترة الحرب العالمية الثانية. بكل ما تحمله تبعات مخاطر الرفض ده عليه وعلى أسرته.
قصة الفيلم بسيطة لكن جذابة في نفس الوقت.. لأنها بتطرح فكرة فلسفية مهمة هي قدرة الأنسان على الثبات على موقفه ورأيه. في مقابل المميزات اللي ممكن يحصل عليها لو بس وافق يخون أفكاره ومبادئه. القرارات اللي بياخدها أي شخص في الوقت ده هي اللي بتحدد مدى إنسانيته وأخلاقه الحقيقية.
A Hidden Life بيقدم مجموعة كادرات أكثر من رائعة. ونقدر نقول أن حركة الكاميرا في الفيلم كانت أكثر من ممتازة. أما عن اختيار أماكن التصوير هي كمان كانت ممتازة وخدمت الفيلم على المستوى البصري بشكل رائع. لكن مشكلتنا الأساسية كانت مع سيناريو الفيلم.
حسينا طوال الوقت أن A Hidden Life مش للمُشاهد العادي اللي عاوز يتفرج على فيلم روائي تقليدي. لكن كتير من مشاهد الفيلم كانت بتعطينا انطباع أننا أمام فيلم تسجيلي مهتم بتوثيق الأحداث أكثر من اهتمامه بتقديم قصة ممتعة. خاصة في النصف الأول من الأحداث.
A Hidden Life فيلم أكثر من رائع للمشاهدين اللي عاوزين يتعرفوا على التجربة البصرية الممتعة اللي بيقدمها المخرج والمؤلف تيرانس ماليك في أفلامه. وطبعا فيلم لا يمكن تفويته لمحبي معرفة الجوانب الأنسانية الصعبة أثناء فترة سيطرة هتلر والنازية.
