The Gentlemen : الكوميديا غلبت الأكشن!
أفلام الكوميديا والأكشن والجريمة بتقدم مزيج غريب من 3 أنواع مختلفة من تيمات الأفلام. وبشكل عام تعتبر بوليود وهوليود من أكتر المدارس اللي بتقدر تقدم التيمات دي مع بعضها. ولما نتكلم عن هوليود وأفلام الجريمة الكوميدية مش هانلاقي أحسن من المخرج جاي ريتشي علشان يقدم النوعية دي من الأفلام.
The Gentlemen بيحكي عن ميكي بيرسون (قام بالدور ماثيو ماكونهي) المجرم الأمريكي اللي بيقرر يبيع امبراطورية تجارة المخدرات اللي أسسها في انجلترا. القرار اللي بيغير كل الأحداث وبيدخلنا في سلسلة من الصراعات في عالم العصابات الأمريكية والانجليزية على حد سواء.
من أفضل الأمور اللي عجبتنا في الفيلم هي الأداء التمثيلي المميز من ماثيو ماكونهي وباقي الأبطال هيو جرانت و تشارلي هونام و كولن فاريل. الأسماء دي مش بس أسماء كبيرة. لكن كمان قادرة تخلق كيميا بينها وبين بعضها علشان يقدموا لنا في النهاية أحداث قوية وكوميديا ممتعة وسط لحظات مميزة من التشويق والاثارة.
لكن لا يمكن نعتبر The Gentlemen فيلم ناجح بدون ما نتكلم عن اخراج جاي ريتشي المميز واللي كان واضح في كل تفصيلة من تفاصيل الأحداث. بصمة ريتشي كانت واضحة خاصة أنه بيلعب في ملعبه المفضل بأفلام عن العصابات وعالم الجريمة اللي قدر ريتشي يضيف عليه بصمته الكوميدية.
لكن لاحظنا أن سيناريو الفيلم منحاز أكتر للكوميديا. حتى في مشاهد الأكشن والمطاردات كان العامل الكوميدي موجود طول الوقت. الموضوع ده ممكن يكون محبط للناس اللي متوقعة أن الفيلم يكون فيه جرعة أكشن عالية. لكن في نفس الوقت مانقدرش نتضايق قوي من جرعة كوميديا مختلطة بالأكشن بشكل كويس.
The Gentlemen فيلم جميل للمشاهدين اللي عاوزين جرعة كوميديا وأكشن معمولين بحرفية واتقان. مع اداء تمثيلي عالي من كل ابطال الفيلم تقريبا.
