٥ أعمال فنية ظهر فيها الرئيس المصري
مافيش شك أن تجسيد الفنان ياسر جلال لشخصية الرئيس السيسي عمل حالة من الجدل في المجتمع المصري، مع بداية عرض مسلسل الاختيار3. لكن الحقيقة أن دي مش أول مرة نشوف الرئيس المصري على الشاشة. تعالوا نشوف أشهر ٥ أعمال تناولت رئيس مصر.
سيرة ومسيرة
من الأعمال القليلة اللي مش بيتم تسليط الضوء عليها بقوة، على الرغم من أنه مسلسل بيتناول حياة الرئيس السابق مبارك، يمكن بسبب أنه مسلسل إذاعي مش تليفزيوني,
سيرة ومسيرة للمؤلف أيمن سلامة وإخراج محمد مشعل، وقام ببطولته الفنان الراحل نور الشريف واتقدم اذاعياً سنة ٢٠٠١.
المسلسل بيحكي سيرة الرئيس مبارك، وزواجه من سوزان مبارك (قامت بالدور الفنانة ميرفت أمين) وترقيه في المناصب لحد ما وصل لمنصب رئيس الجمهورية، وبيكمل معانا المسلسل لحد حادث محاولة اغتيال أديس أبابا الشهير.
في تصريحات صحفية بعد إذاعة المسلسل، نور الشريف قال أن العمل كان يعتبر مسودة تحضيرية لعمل تليفزيوني بيتم تحضيره، عن حياة مبارك، لكن العمل ده ما شافش النور
طباخ الرئيس
مستحيل نتكلم عن فيلم بيظهر فيه رئيس الجمهورية، منغير ما ييجي على بالنا (طباخ الرئيس) اللي تم انتاجه سنة ٢٠٠٨ وقام ببطولته طلعت زكريا – الله يرحمه- وداليا مصطفى، وقام بدور الرئيس الفنان خالد زكي. الفيلم من تأليف يوسف معاطي وإخراج سعيد حامد.
الفيلم أتصور في عصر الرئيس مبارك، لكن لم تتم الإشارة له بشكل مباشر في الأحداث، على العكس من مسلسل الاختيار3 اللي تم تسمية الرئيس السيسي باسمه ورتبه العسكرية. لكن كان فيه إشارات كتير – غالبها كوميدية – عن شخصية الرئيس مبارك.
ظاظا
في بداية الألفية الجديدة، بدأ الفنان هاني رمزي سلسلة أفلام لها طابع سياسي. البداية كانت مع جواز بقرار جمهوري سنة ٢٠٠١ عن شاب عاوز يعزم رئيس الجمهورية على فرحه، ثم (عايز حقي) سنة ٢٠٠٣ عن شاب عاوز يبيع نصيبه في المال العام، وأخيراً (ظاظا) سنة ٢٠٠٦.
الفرق بين (جواز بقرار جمهوري) و (ظاظا)، أن رئيس الجمهورية بيظهر في مشاهد أكتر بكتير في (ظاظا) لكن برضو دون الإشارة له بشكل مباشر، أو تسمية الرئيس.
الفيلم من تأليف طارق عبد الجليل (وهو شقيق الفنان عمرو عبد الجليل بالمناسبة) وإخراج على عبد الخالق وعلى الرغم انه ماحققش نجاح سينمائي ضخم، لكن حقق نسب مشاهدة كبيرة في القنوات الفضائية.
المشخصاتي ج ٢
اشتهر الفنان تامر عبد المنعم بتقديم شخصية (شلبي) أو المشخصاتي.. الشاب المُهمش اللي بيحاول يكسب شوية فلوس من خلال موهبة تقليد المشاهير.. الجزء الأول من الفيلم أتقدم سنة ٢٠٠٣ وقلد تامر من خلاله نجوم بحجم عادل امام، عمرو دياب، أحمد زكي، محمد فؤاد، وغيرهم. وفي ٢٠١٦ قرر تقديم الجزء التاني من الفيلم، لكن المرة دي من خلال تقديم شخصيات سياسية، على رأسها محمد مرسي، واللي تم تناوله بإسمه وشخصه، هو وسلسلة طويلة من الشخصيات اللي لعبت دور محوري في الحياة السياسية المصرية في الفترة دي.
المشخصاتي ٢ تم انتاجه وتقديمه في فترة حرجة من تاريخ مصر، بالتالي ما أخدش اهتمام كبير رغم جرأة طرحه و(توثيقه) لأيام درامية في الحياة السياسية المصرية.
ناصر ٥٦ و أيام السادات
طبعا مانقدرش ننسى في النهاية فيلمين من أحلى وأهم الأفلام اللي تناولت سيرة حياة الرؤساء، وهي أفلام ناصر ٥٦ وأيام السادات، واللي قام ببطولتهم الفنان أحمد زكي، واللي يُحسب له ويُحسب لتاريخه أنه أدى شخصيتين لرئيسين مصريين مختلفين جدا من حيث الشكل الخارجي وطريقة الكلام والتعامل، وفي كلا الشخصيتين أقنعنا زكي بالأداء لدرجة أننا لما بنتكلم عن واحد من الرؤساء دي بييجي في بالنا شكل أحمد زكي وهو بيقدم شخصياتهم علطول.
سلسلة الأفلام دي شجعت أحمد زكي على تقمص شخصية الفنان عبد الحليم حافظ في أخر أفلامه اللي قدمه في ٢٠٠٦ وهو (حليم).
أما أهم ما يميز (الاختيار ٣) أنه بيقدم شخصية رئيس حالي لمصر، وده أكيد كان تحدي كبير لصناع المسلسل، خاصة أن الأجزاء السابقة من الاختيار عودتنا على الجرأة في الطرح وكشف خبايا عن أيام صعبة في حياتنا.. هانستعرض ده بشكل مفصل في مراجعتنا لـ (الاختيار٣) اللي هايتنشر في الأيام المقبلة.
