A Day to Die : فيلم فاقد للتركيز

عارفين ايه أهم عامل لنجاح أي فيلم؟ مش الميزانية، ومش أسماء الأبطال الكبيرة.. الأهم هو أن الفيلم نفسه يكون عارف هو عاوز يقدم ايه، وهايقدمه ازاي، وهي دي أكبر مشكلة وقع فيها فيلم A Day to Die.. أنه حاول يقدم كل تيمات أفلام الأكشن، وفي الأخر مانجحش أنه يثبت على تيمة واحده.

A Day to Die بيحكي عن ظابط شرطة بيتورط مع عصابة مسيطرة على عالم الجريمة، وبيخطفوا زوجته الحامل للضغط عليه علشان يتعاون معاهم. لكنه بيتفق مع أصحابه القدامى علشان يسترد حبيبته ويواجه العصابة.

ممكن نقول أن A Day to Die حاول يكون فيلم عن اقتحامات الشرطة وعمليات التفاوض على الرهائن، ثم حاول يبقى فيلم عن عملية خطف ومحاولة تحرير الزوجة/الحبيبة المخطوفة. وأخيرا حاول يكون فيلم عن سرقات البنوك والمطاردات مع الشرطة. وفي النهاية فشل أنه يحقق هدفه في أي تيمة من دي. لأنه ببساطه حاول يلعب على كل الحبال.. وفشل.

ليه فشل؟ علشان صاحب بالين كذاب. فما بالك بصاحب ٣ (بالات)! ودي غلطة المخرج  ويز ميلر بالأساس، حتى أن الفيلموجرافيا بتاعته مافيهاش أفلام ممكن تعلق في الذاكرة أو نحس أن لها قيمة فنية كبيرة.

مين اللي كان المفروض يسد كل ثغرات السيناريو والإخراج دي؟ التمثيل. وهنا كان المفترض يكون دور بروس ويلز كممثل عالمي له ثقل كبير. لكن أداء ويلز في الفترة الأخيرة كان ضعيف جدا. ودي نقطه مش عاوزين نتكلم فيها كتير علشان عرفنا بعد كده أن عنده مشاكل صحية كبيرة هاتبعده عن عالم التمثيل تماماً.

في الأداء كمان عندنا ابننا المصري محمد كريم في دور رينولدز. دور مش بياخد كتير ظهور على الشاشة، لكن له دور محوري في الأحداث. والحقيقة في الكلام عن كريم، بنبقى مش عارفين نشجع محمد علشان جنسيته، ولا نتكلم عن أداؤه بشكل متجرد. وبصراحة شديدة محمد كريم ناقصه كتير فيما يتعلق بالحضور والكاريزما، ومحتاج يشتغل أكتر على أدواته كممثل، قبل ما يهتم انه ينتشر في أكبر قدر ممكن من الأعمال الهوليودية بدون التفكير في أي اعتبارات تانيه.

هل معنى كده أن A Day to Die مافيهوش أي ميزة؟ نكون ظالمين لو قولنا كده. الفيلم بيقدم تجربة مغامرات جيدة، مشاهد أكشن كتير، بسيناريوهات مُختلفة. مع قصة مش هاتتعبوا كتير في متابعتها لأنها (كليشيه) جدا. بالتالي اللي عاوز سهرة مع فيلم أكشن له أكتر من تيمة وبدون (تشغيل دماغ) كتير. A Day to Die هايكون اختيار مناسب في ليلة صيفية مع مشروب غازي.