Troll: جودزيلا بجواز سفر نرويجي
ماينفعش نقول أن فيلم Troll المعروض حالياً على شبكة نتفليكس، فيلم (أصلي)، بمعنى أنه بمجرد مشاهدة اعلان الفيلم، هاتعرفوا أنه شبه مقتبس من قصص الوحوش العملاقة، زي جودزيلا على شبيه المثال، لكن المميز في Troll أنه استخدم أساطير وقصص أصلية في قصته، وده اللي أعطى للفيلم قيمة حقيقية.
فيلم Troll بيحكي عن أسطورة نرويجية قديمة، عن وحش عملاق بيهاجم البشر. الأسطورة بتفضل أسطورة وقصة من قصص الأطفال قبل النوم، لحد ما يكتشف فريق بحثي وجود الكائن ده بالفعل. ومن هنا بتبدأ محاولات الدولة السيطرة عليه وقتله، بينما بيتجه فريق علمي لحلول تانيه أقل دموية. علشان نعرف مين اللي هايقدر ينفذ خطته بكفاءة أفضل؟
فيلم Troll هو البديل النرويجي لأفلام الوحوش العملاقة، ولضمان نجاح الفيلم تم رصد ميزانية عملاقة، والميزانية جابت نتيجتها من خلال مشاهد أكشن ومشاهد الوحش العملاق الأكثر من رائعة، لكن السيناريو الشبه مقتبس من أفلام تانيه كان هو اللي بيفسد علينا متعتنا.
مشكلة Troll الأساسية أنه قدم كل حاجه في القصة زي أي فيلم وحوش تاني، بدون أي تغيير، زي لما بنشوف المسئولين الحكوميين وهم عندهم غباء وبطء في اتخاذ القرار، وزي ما بنشوف القائد الحربي اللي بيميل طوال الوقت للحل العسكري الغاشم، وزي ما بنشوف العالم المجنون المهووس بفكرة معينة ومش عاوز يغير رأيه. كل دي (كلاشيهات) اتهرست في مليون فيلم قبل كده.
على صعيد تاني، شوفنا أداء جيد من أبطال الفيلم، وعلى رأسهم طبعا إين ماري ويلمان في دور (نورا) بطلة الأحداث. وبشكل عام نرشح فيلم Troll للناس اللي عاوزه تتفرج على فيلم عن وحش عملاق بيدمر كل حاجه، وماعندهمش مشكلة يتفرجوا على فيلم (جودزيلا) بنسخة ٢٠٢٣ وبجواز سفر نرويجي!
