رسالة الإمام: الصياح دليل على النجاح!
لو سألت أي سياسي محترف، هايقول لك أن الاهتمام بالسياسة بيقل لأقل معدل له خلال شهر رمضان الكريم، علشان بيزاحم السياسة الكنافة والقطايف والمسلسلات اللي مش بتخلص من بعد الفطار لحد السحور. لكن في رمضان ٢٠٢٣ ومع عرض مسلسل رسالة الإمام، حسينا أن المعارك السياسية اختارت لنفسها المرة دي مكان مختلف للصراع، والساحة هي شاشة التليفزيون!
مسلسل (رسالة الإمام) بيحكي عن قصة حياة الإمام محمد الشافعي، المعروف عند كل المصريين تقريباً باسم الإمام الشافعي، ورحلاته المختلفة لدول العالم، واستقراره في مصر ودراسته لأوضاعها، وتأثيره الكبير على الأوضاع الدينية والاجتماعية والسياسية فيها.
كان المفترض المسلسل يمر كأي مسلسل رمضاني تاني، لكن حصل عليه جدل كبير على السوشيال ميديا، نتيجة استعراض بعض مستخدمي السوشيال ميديا لأخطاء حصلت في المسلسل، بينما دافع ناس تانيه عن المسلسل واتهموا اللي زعلانين منه أن عندهم خلافات سياسية مع الشركة المنتجة، أو مع فكرة أن يكون عندنا عمل مصري قوي بيستعرض فترة مهمة من تاريخ مصر.
بعيدا عن كل الجدل السياسي ده.. تعالوا نتكلم عن أحلى وأهم حاجه في مسلسل رسالة الإمام.. الناحية الفنية.
قصة المسلسل مترابطة، مع التنويه على أن مش كل الأحداث والشخصيات اللي في المسلسل لازم تكون حقيقية، لأننا في النهاية بنتفرج على عمل فني مش على وثيقة تاريخية. ويكفي أننا نقول مثال أن فيلم Inglourious Basterds كان عن قصة بيتم اغتيال هتلر فيها على يد مجموعة كوماندوز أمريكان! بالتالي مش لازم دايما العمل الفني يكون معبر عن التاريخ بنسبة ١٠٠٪.
تنفيذ القصة على الشاشة كان ممتاز جدا. وكان فيه اهتمام عالي بأدق التفاصيل، في واحد من المشاهد كنا بنشوف مشاعل معلقة على الحيطة، ولفت نظرنا أن المشاعل سايبة علامة وراها. ودي نقطة من حاجات كتير حسينا فيها باهتمام رائع بالتفاصيل، على يد المخرج الليث حجو وهو مخرج سوري وواضح أنه عاوز يسيب علامة مختلفة ومميزة من خلال إخراجه لـ (رسالة الإمام).
مش حابين نكتب فقرة عن أداء خالد النبوي، بينما المفترض يتكتب موضوع كامل عنه. الصراحة أن النبوي تفوق على نفسه في رسالة الإمام من خلال تجسيد الشخصية، اللي ماحدش شافها بعينة، لكنه قدر يبتكر لها طريقة حركة، وطريقة كلام، وطريقة تعامل وتصرف خاصة بها، ومختلفة عن كل الشخصيات اللي عملها قبل كده في تاريخه، مع تعبيرات وجه ونظرات عين مُعبرة جدا.
خالد النبوي بيقدم واحد من أحسن أعماله، ونعتقد أن دوره في رسالة الإمام هاينقله نقله مختلفه تماما.
بس مش النبوي لوحده اللي عمل دور كويس، عندنا أسماء كتير مشاركه في المسلسل بقوة مش عاوزين ننسى حد فيها، منهم مثلا حمزة العيلي، اللي ربما للمرة الأولى بياخد حقه كامل في ابراز موهبته للنهاية، وواضح أنه مش عاوز يضيع الفرصة ومقدم لنا لحد دلوقت أداء أكتر من رائع.
رسالة الإمام بيمتاز كمان بمشاهد وكادرات جميلة جدا، مع اهتمام عالي بتفاصيل الإضاءة المتناسبة مع عصر كان بيستعمل الشموع كوسيلة إضاءة، لكن من ناحية تانيه بعض الانتقادات اتوجهت للمسلسل بخصوص استعماله بعض الأبيات الشعرية المنسوبة للإمام الشافعي لكنها مش له. على الرغم من أن المؤلف محمد هشام عبية مشهور عنه الاهتمام بالبحث والتدقيق في كل أعماله.
مسلسل رسالة الإمام يستحق مشاهدة متأنية واعية دقيقة، وأنه مايكونش مجرد عمل من ضمن كذا عمل تاني في رمضان، والأهم، أنه يستحق يتم تقييمه بشكل فني فقط، بدون أي اعتبارات سياسية ممكن تخلي المشاهد متحيز، سواء مع أو ضد المسلسل.
