ايجار قديم: الايجار قديم بس الكوميديا جديدة
مهما طال الوقت، ومهما شوفنا أعمال لها علاقة بالجريمة والرعب، هايفضل فيه مكان خاص في قلبنا للدراما العائلية، بداية من مسلسلات استمرت لمواسم كاملة كتيرة زي يوميات ونيس، أو الأعمال الأحدث زي (سابع جار) و (أبو العروسة) وغيرها. مسلسل (ايجار قديم) بينتمي للدراما الأسرية اللي بنحبها، ويعتبر إضافة قوية ومؤثرة وتستحق الاحترام.
نظام (الايجار القديم) هو نظام ايجار كان معمول بيه في مصر لوقت طويل، بيضمن للمستأجر أنه يفضل موجود في الشقة ولا يغادرها، طالما مستمر في دفع ايجارها، وأبن المستأجر يقدر يستمر في نفس الشقة، طالما كان مقيم مع أهله فيها. ومع تطور الزمن وارتفاع الأسعار، فضلت عقود الايجار مستمرة بقيمتها القديمة، ده تسبب في ظلم ناس كتير من أصحاب العقارات.
المسلسل بيلقي الضوء على المشكلة دي من خلال قصة رمزي (شريف منير) اللي بيضطر يرجع للعمارة اللي بيملكها، علشان يتفاوض مع السكان على أنهم يتركوا له شقة واحدة على الأقل يقيم فيها، علشان يلاقي نفسه وسط مجموعة من القصص المختلفة لكل واحد من السكان، ويدخل في نزاع قانوني مع ابن واحد من أصحاب الشقق دي (محمد الشرنوبي). وفي وسط النزاع ده بنبدأ نشوف باقي قصص السكان.
أحلى ما في مسلسل (ايجار قديم) أن صناعه عارفين جمهورهم المستهدف كويس، وهو الجمهور اللي بيحب الدراما العائلية. بالتالي المسلسل صالح للمشاهدة من كل أفراد الأسرة بدون قلق، بالإضافة لأنه بيناقش مجموعة قضايا بتهم قطاع كبير من الأسر المصرية، كل ده في اطار من الكوميديا الاجتماعية الراقية.
بيشهد (ايجار قديم) ظهور مجموعة من الممثلين اللي بنشتاق لأعمالهم زي شريف منير وصلاح عبد الله و ميمي جمال و حنان سليمان وعلاء زينهم، وغيرهم من الفنانين، اللي كان ممكن المسلسل يعمل بيهم شغل عالي قوي، لكن شاء صناع المسلسل أنهم يدخلوا على الخط مجموعة فنانين من الأجيال الأحدث علشان يحصل تناغم بين الأجيال، بالتالي شوفنا أداء عظيم من هشام إسماعيل و حازم سمير ورحمة حسن والوجه الجديد الهام وجدي في دور الدكتوره ليلي، والهام رغم أنه دورها الأول، لكنها مش بعيدة عن الوسط الفني، كونها ملكة جمال مصر لسنة ٢٠٠٩ وعارضة أزياء ومهندسة ديكور، والحقيقة أنها قدمت دور أول مميز في المسلسل، بيخلي عندنا ثقة أننا هانشوفها في أعمال كتير قوية قادمة. لو بس اشتغلت أكتر على أن تعبيراتها تكون بعينها وروحها قبل ما تكون بملامح وجهها.
عمرو الدالي مؤلف (ايجار قديم) كان عارف كويس أنه شغال على عمل جماعي، بالتالي وزع في قصته جرعات من الكوميديا – واحيانا التراجيديا- على الجميع بدون الانحياز لشخصية عن التانية، ونتيجة ده شوفنا المسلسل متزن والشخصيات مرسومة كويس، لكن بعيدا عن الشخصيات الأساسية (الشرنوبي وشريف منير وصلاح عبد الله) حسينا أن باقي الشخصيات ماشية في (تراك) واحد مش بتغيره طول الوقت. بمعنى أن المحامي وزوجته (هشام إسماعيل و رانيا عبد المنصف) شخصيات عندها شره للطعام طول الوقت، وكل مشاهدهم بتتمحور حوالين النقطة دي بدون تغيير، بينما (ميمي جمال) في شخصية ثريا وجدي الفنانة المعتزلة، كل مشاهدها بتتمحور حوالين كلامها عن الماضي، ورغبتها في العودة للشهرة والنجاح تاني.
ايجار قديم محاولة موفقة لمناقشة قضايا اجتماعية في قالب اجتماعي أسري، صالح للمشاهدة من كل أفراد الأسرة وبدون شعور بالملل أو الخروج عن السياق.
