أفلام عيد الفطر ٢٠٢٥
مع قرب عيد الفطر ٢٠٢٥ بتتسابق مجموعة من الأفلام العربية على عيدية الشباب، اللي انطلقوا أخيرا لدور العرض بعد شهر كامل من متابعة دراما رمضان في البيوت..
وعلشان احنا في كايرو ٣٦٠ عارفين انكم بتحبوا السينما ومع احترامنا الكامل للدراما الرمضانية، لكن مافيش أمتع ولا أحلى من خروجة السينما. ومتعة الاسترخاء قدام الشاشة العملاقة علشان نتفرج على ساعة ونص من المتعة…
تعالوا نتعرف على الأفلام اللي هاتصدر في السينمات في موسم عيد الفطر ٢٠٢٥
سيكو سيكو
واحد من أكتر الأفلام المنتظرة في موسم عيد الفطر ٢٠٢٥. الفيلم بيدور في اطار كوميدي عن شابين، واحد Gamer والتاني بيشتغل في شركة شحن، وبيدور بينهم مجموعة من المواقف الكوميدية.
سيكو سيكو بطولة عصام عمر وطه دسوقي، الثنائي اللي حققوا نجاح ممتاز لما اتعرضت أعمالهم في رمضان ٢٠٢٥. وده مخلي ناس كتير مستنيه عمل يجمعهم مع بعض. وبيشارك في البطولة سليمان عيد وخالد الصاوي.
ريستارت
تامر حسني من نجوم الطرب اللي بيحبوا يقدموا لنا عمل سينمائي من وقت للتاني. في موسم عيد الفطر ٢٠٢٥ تامر بيرجع لنا بفيلم (ريستارت) اللي بيدور هو كمان في اطار كوميدي.
لسه مش باين كتير عن قصة الفيلم لكن بيشارك بطولته مع تامر هنا الزاهد ومحمد ثروت وباسم سمرة.
(ريستارت) من تأليف أيمن بهجت قمر، ومن إخراج سارة وفيق.
الصفا الثانوية بنات
محبين مسرح مصر هايتمتعوا مع فيلم (الصفا الثانوية بنات) اللي بيحكي عن قصة حب بتدور في مدرسة ثانوي.
الفيلم من بطولة علي ربيع وساره الشامي و وإسماعيل فرغلي وهالة فاخر وغيرهم من النجوم.
نجوم الساحل
النجوم الشباب بقى عاملين فيلم (نجوم الساحل) اللي هو كمان بيدور في اطار كوميدي، عن مجموعة شباب بتقرر تنظم حفلة مش تقليدية في الساحل.
نجوم الساحل بطولة أحمد داش ومايان السيد و علي صبحي وكزبره.
واضح أن الكوميديا مسيطرة على موسم عيد الفطر ٢٠٢٥. هانرجع لكم في مراجعات مستفيضة مع الأفلام اللي عملت اقبال كبير في الموسم المهم ده.
