Insidious: Chapter 2: كفاية أفلام رعب
كتبنا وتكلمنا كثير عن تقليدية أفلام الرعب اللى أصبحت هوليوود بـ تقدمها مؤخرًا لدرجة أننا لو عملنا CopyوPaste من أى مقال كتبناه عن أى فيلم رعب تم إنتاجه فى السنة الأخيرة هـ يصلح للقراءة لأن مافيش أى شىء تغير! وهنا لازم نستغرب من هوليوود المتفوقة دائمًا فى الأفكار الجديدة أن مخرجيها وكتاب السيناريو فيها عاجزين عن ابتكار أى شىء جديد فيما يتعلق بأفلام الرعب!
للإنصاف، الجديد فى فيلم النهارده أنه بـ يقدم سيناريو جانبى بالإضافة لكون الأشباح والأرواح هى اللى بـ تسبب المشكلات فى المنزل المسكون، أنه بـ يقدم خيط بسيط للشك فى الزوج المحترم اللى بـ يحاول يحافظ على بيته وحياته الزوجية، وبـ يبدأ المشاهد يحس بالشك فى أحد أبطال الفيلم جنبًا إلى جنب مع السيناريو التقليدى للرعب.
المخرج جيمس وان قرر أنه يلعب على نفس التيمة التقليدية لأفلام الرعب، بيت مسكون وطفل يعتبر وسيط بين عالم الأشباح وعالم البشر، ومحاولة لبدء حياة جديدة فى بيت جديد من عائلة شافت أحداث صعبة كثير فى الوقت الأخير، هو ده ملخص القصة اللى بـ يقوم ببطولتها باتريك ويلسون، روز بيرنى، ولين شاى وآخرين.
على الرغم أن الموسيقى التصويرية ما لعبتش أى دور يذكر فى الأحداث اللهم إلا الارتفاع المفاجىء فى لحظات “الخض” اللى انتهجها المخرج كطريقة لإرعاب المشاهدين من اللحظة الأولى، إلا أن المؤثرات الخاصة لعبت بعض الدور الإيجابى فى أحداث الفيلم، على الرغم أننا مش متحمسين جدًا لأسلوب الإنتاج اللى بـ يقدم الأشباح بنفس الطريقة اللى شوفناها بها فى أكثر من فيلم ثانى، بالإضافة للاعتماد على أسلوب الخض اللى أصبح نهج أساسى فى أفلام هوليوود فى الفترة الأخيرة بالكامل.
Insidious: Chapter 2 فيلم تخشه لو كنت من المهووسين بأفلام الرعب مهما كان مستواها أو مستوى تكرار الأفكار فيها، أما لو كان الرعب مش تفضيلك الأول أو لو كنت زهقت زينا ننصحك تشوف فيلم أكشن أو رومانسى، وتستنى شوية على أفلام الرعب لأن واضح أن المرحلة القادمة مش هـ تشهد تغير فى أسلوب أفلام الرعب.
