Getaway: لعشاق أفلام العربيات
الأفلام اللى بـ تعتمد على السرعة والتحكم فى العربيات وقيادتها بـ تستهوينا طوال الوقت، وإلى حد ما تعتبر من الأفلام مضمونة النجاح لمحبى وعشاق قيادة العربيات والأفلام اللى بـ تتكلم عنها.
المخرج كورتينى سولمون بـ يقدم لنا على مدار حوالى ساعة ونصف هى عمر الفيلم مغامرة شيقة بـ يقوم ببطولتها إيثان هوك فى دور متسابق متقاعد بـ تتعرض زوجته للاختطاف وبـ يحاول طوال أحداث الفيلم يوصل لها بسلام، بعد ما بـ يقرر الخاطف أنه يدخله فى سلسلة من المطاردات المثيرة مع الشرطة بمساعدة “سيلينا جوميز”.
التشويق والإثارة كانت عنوان الفيلم طوال المدة، لكن بعض الأحداث كانت غير منطقية أو مقبولة، وكان لازم على المشاهد أنه يعديها من باب “تكبير الدماغ” وزى ما قولنا قبل كده أن السينما هى فن انخداع المشاهد بإرادته الحرة من خلال الأداء التمثيلى.
على ذكر الأداء التمثيلى لازم نقول أن إيثان هوك ما كانش بنفس قدراته التمثيلية اللى شوفناها له فى أفلام ثانية قبل كده، إلى حد ما كانت انفعالاته بـ تتسم بالبرود، وواضح أن كثرة الاستعانة بالدوبلير فى أداء المشاهد الخطرة قللت علاقته الشعورية بالفيلم فأصبح أداؤه التمثيلى الدرامى ضعيف.
الموسيقى التصويرية كانت بـ تغيب عن بعض المشاهد، وده أكسب المشاهد قوة فى التأثير على المشاهد من خلال التأثير الصوتى لأصوات التحطيم والتكسير، لكن بشكل عام الموسيقى التصويرية كان ممكن تكون أقوى من كده، لكن الفيلم يكسب على صعيد المؤثرات الخاصة وتنفيذ المشاهد الصعبة وطبعًا البذخ الإنتاجى فى تحطيم كل العربيات دى.
لو كنت من محبى أفلام السرعة والمسابقات لازم تشوف الفيلم ده، أما لو مش بـ تحب كمية العربيات اللى بـ تتحطم دى تقدر تشوف فيلم ثانى.
