About Time: عن أخطاء الماضى
الحقيقه أننا بـ نتعب من فكرة الأفلام اللى بـ تتناول موضوع السفر عبر الزمن لأن على مدار الفيلم بـ يفضل عقلنا يلف فى دواير مفرغة وفى الآخر بـ نحس أننا ما فهمناش 100% من الحبكة الأساسية للفيلم، قولنا ده قبل كده فى فيلم Looper، لكن فى فيلم النهارده إحنا مش حاسين أننا فى نفس المتاهة، لأن الفكرة والقصة كانوا أكثر وضوحًا.
من إخراج ريتشارد كيرتس وبطولة دومهال جليسون وراشيل ماك أدامز بـ نشوف قصة عن شاب بـ يأخذ الفرصة أنه يرجع بالزمن للخلف ويصحح أى أخطاء ارتكبها فى الماضى وبالتالى يغير المستقبل بالكامل.. مين فينا ما حلمش بالفكرة دى وتمنى لو يوم يقدر يرجع فيه بالزمن للخلف إما لمقابلة حبيب أصبح غايب عن دنيتنا، أو لتصحيح خطأ صعب عملناه مع حد عزيز علينا؟ أو مهما كان السبب، بـ نكتشف خلال أحداث الفيلم أن الإنسان لو كان فى أيده الرجوع للماضى كان هـ يصمم يخلي حياته تمشى بنفس النمط القديم نفسه.
على الرغم من أن الفكرة مكررة إلا أن التنفيذ كان لا بأس به بالنسبة لفيلم متوسط التكلفة بـ يحاول يرسم البسمة على وجوه المشاهدين بالإضافة للمحة درامية لا بأس بها، الديكور والموسيقى التصويرية ما كانوش بالقوة اللى كنا متوقعينها خصوصًا الموسيقى التصويرية كنا بـ نحس فى بعض المشاهد أنها مش متماشية مع روح الفيلم.
ميزه هوليوود بـ تتمثل فى قدرتها على تقديم أفلام تراعى كل الأذواق، لو بـ تحب تشوف فيلم خفيف وله فكرة ظريفة وتقضى وقت ممتع ننصحك تشوف About Time.
