Mr. Peabody & Sherman : أنيميشن ظريف فى نهاية الاسبوع

فى ظل الظروف الملخبطة اللى بنعيشها كلنا الايام دى ، بيكون من الجميل اننا نتابع فيلم انيميشن لطيف يفصلنا عن كل المشاكل دى ، اما بالنسبه للاطفال ، افلام الانيميشن فرصة ممتازة لتوسيع مداركهم بطريقة مسلية بعيدا عن نظام الدروس الخصوصية وحصص العلوم .

من اخراج روب مانكوف واداء صوتى ل تاى بيرل ، ماكس شارلز و اليسون جانى بنشوف قصة الكلب المتكلم العبقرى بيبودي ، اللى رغم امكانياته العقلية المذهلة ، الان انه لما بيقدم على طلب لتبنى احد ابناء البشر بيقابل بكثير من العقبات والتشكيكات ، ثم بتمشى الامور بشكل طبيعى الى ان يقرروا عمل رحلة بألة الزمن  .. اعظم اكتشافات (بيبودي) العبقرى ، ومن هنا بتبدأ الرحله الحقيقية للفيلم من خلال مغامرات رائعة عبر الزمن ، بداية من عصور الفراعنة وحتى الثورة الفرنسية وغيرها من المواقف التاريخية اللى بيقدمها الفيلم باسلوب كوميدي .

الرسوم المتحركة تم تنفيذها بدقة متميزة ، كمان التحريك كان جميل ومتناسق ، وما نقدرش ننكر ان تنويعات الألوان واختلافها فى كتير من المشاهد كان عنصر جذب مميز لعيوننا وأكيد عيون الأطفال اللى اتفرجوا على الفيلم .

الموسيقى التصويرية للأسف ما كانش عندنا احساس بتميزها فى اى شىء ، كانت مواكبة للاحدث وخلاص لكنها ابدا ما اخدتش طابع الريادة فى احد  المشاهد او كانت هى العنصر المحرك للاحداث ابدا ، لكن لا ننكر انها قامت بدورها فى حدود المطلوب منها وخلاص .

الاداء الصوتى للشخصيات كان متميز وخصوصا الطفل ماكس تشارلز اللى قام بدور شيرمان ، كانت تعبيراته الصوتية طفولية ومميزة جدا وقدر يوصل احساسة من خلال صوته بشكل ينافس كبار الفنانين سنا ومقاما .

Mr. Peabody & Sherman رحلة فى التاريخ القديم والمعاصر ، تناسب الكبار والاطفال على حد سواء .. ننصحكم تشوفوه فى الويك اند