فزاع : كيف تحرق شخصية ناجحة؟!
ايه أسوأ شىء ممكن تعمله لشخصية تليفزيونية ناجحة؟ استلهكها.. وبمنتهي الاستهانة الفنية وعدم الاهتمام بتأصيل الشخصية واكسابها ابعاد جديدة.. اعلانات تليفزيون على فيلم ضعيف المستوي، والنتيجة؟ : الناس هاتنسى الشخصية بنفس السرعة اللى حبيتها بيها، وده اللى هايحصل مع هشام اسماعيل او فزاع، مالم ينقذه ذكاء فني واثقين من تمتعه بيه.
من اخراج ياسر زايد وتأليف هشام اسماعيل، بنشوفه فى شخصية (فزاع) المشهورة من مسلسل الكبير قوي، فزاع بيقرر يسافر للقاهرة لتحقيق حلمه والسعي وراؤه، وهناك بتحصل له صدمه نتيجة الانتقال من المجتمع الريفي او الصعيدي للمجتمع القاهري.. نفس التيمة اللى لعب عليها عدد كبير من المخرجين والمؤلفين، وللاسف (هشام اسماعيل) كممثل او مؤلف، لم يقدم اى جديد فى المجال ده.
المواقف الكوميدية اعتمدت فى غالبها على الايفيهات، مع بعض المواقف المعتمدة على ذكاء (هشام) الفني وقدرته على الايحاء بالكوميديا بدون كلمات، وده شىء يحسب له، لكنه كان قليل فى اجمالى مشاهد الفيلم، وحتي المشاهد اللى كان ممكن يخرج منها كوميديا متميزه قتلها الاخراج بسطحيته ونمطيته.
الفيلم اعتمد فى جزء كبير منه على جمل التنمية البشرية اللى بنشوفها على الفيس بوك وفى قنوات اليوتيوب، جمل من عينة : اعمل اللى تحبه ودور على نفسك..الخ وتم استغلالها فى نهاية الفيلم بشكل سطحي وكنا عارفين ازاى وامتي بالظبط هايتم استخدامه ودي كانت سقطة اخراجية لا تغتفر، ومحاولة اكساب العمق لعمل المفروض بالاساس انه مصنف تحت خانة الايت كوميدي.
الفيلم شهد ظاهرتين ايجابيتين : الاولى عودة الفنان حمدي الوزير للشاشة، وقدرة الفيلم على تطويع استغلال شبكات التواصل الاجتماعي للصور القديمة للفنان فى التريقة والغمز واللمز، وتحويل ظهوره لمناسبه بتثير فى جيل الثمانينات والتسعينات احساس بالـ(نوستالجيا)، والظاهرة الثانية هى الفنانة (سيمون) واللى ليها فى قلبنا مساحة خاصة من الحب والاعتزاز و (النوسالجيا) ايضا، وظهرت فى اغنية احترنا فى تصنيفها، هل مستواها قوي فعلا ام ان اعتزازنا وذكرياتنا المرتبطة بسيمون هي اللى جعلتنا نشعر انها قوية؟ وبعد تفكير نعتقد اننا بنميل للفكرة الثانية اكتر .
اخر كلامنا عبارة عن همسة فى اذن الفنان الذكي هشام اسماعيل : اخرج من عباءة (فزاع) واستثمر نجاحها –او المتبقى منه بمعني اصح- فى شخصيات وقوالب جديده تانيه. انت موهوب وتستحق ما هو افضل من انك تتحفظ فى شخصية واحده واداء واحد.
