حارة اليهود : الأخطاء اسقطت العمل
بقدر ما كانت توقعاتنا وانتظارنا لمسلسل حارة اليهود قوي، نتيجة البرومو المتميز للمسلسل واسماء الابطال اللى كنا منتظرينها بشوق، بقدر ما كانت خيبة امالنا مع كم الاخطاء التاريخية والفنية فى المسلسل، واللى حولته من عمل المفروض انه يكون درامي تاريخي، الى عمل فانتازي هش غير مترابط وواضح فيه الضعف على صعيد الاخراج والكتابة.
المسلسل بيحكي عن حالة التناغم بين الاديان اللى كانت مصر بتعيشها قبل ثورة 1952 وازاى كانت حارة اليهود مكان بيتسع للمسلمين والمسيحيين واليهود على كافة طوائفهم واختلافاتهم العرقية والمذهبية. وازاى كل الجهود كانت بتتضافر للتخلص من الاحتلال الانجليزي لمصر، مع بداية انشاء الدولة الاسرائيلية وبداية تدخل جماعة الاخوان المسلمين فى السياسة، ومحاولتهم كسب ارض جديدة مع الحكومة المصرية الناشئة من خلال تصوير يهود مصر على انهم متفقين مع نشأة دولة اسرائيل.
على الرغم من الجو التاريخي الجميل واللى ممكن يطلع منه دراما متميزه، وعلى الرغم من زخم الشخصيات والاحداث، الا ان التعامل مع كل الامور دي على صعيد السيناريو تم باستهتار شديد وبعدم اتقان، الامر اللى جعل كمية الاخطاء التاريخية فى اول 7 حلقات فقط فضيحة حقيقية، منها على سبيل المثال اظهار بيوت البغاء على انها كانت مقننة فى مصر على الرغم من انها تم الغاء تصريحاتها قبل الحقبة اللى بيتكلم عنها بكتير، ومنها ايضا اظهار الغارات على مصر على الرغم من ان التاريخ بيقول ان غاره واحده فقط هى اللى تمت على مصر فى الحرب العالمية الثانية!
الديكور المتميز والبيوت الواسعة الجميلة اللى تم اظهارها فى المسلسل هى فى الحقيقة مغالطه للتاريخ، لان سكان حارة اليهود فى الاصل كانوا تحت خط الفقر وكانت منازلهم اصغر واحقر بكتير من اللى ظهرت فى المسلسل، وممكن نقول اننا بكثير من حفظ ماء الوجه لازم نعتبر المسلسل حالة فنية خالصة بعيدا عن اى مقارنة بالتاريخ الحقيقي لان المقارنة مش هاتكون فى صالح المسلسل ابداً !
تمثيل اياد نصار متميز كالعادة، هادىء ومتزن وقادر يتحكم فى انفعالاته.. منه شلبى لسه بتحاول توازن بين شقاوة شخصيتها وبين شخصيتها فى المسلسل واللى لازم تكون اكثر اتزانا، لكن منه قدرت تقوم بدورها بشكل كويس، ولازم لا ننسى دور سيد رجب فى دور البلطجي واللى قدر يقوم بيه بشكل ممتاز.. رجب اثبت نفسه فى اكتر من عمل رمضان 2015 والسنين اللى فاتت كمان بتدل على انه فنان له موهبه وحضور متميز، ويقدر يتلون فى اى دور يقوم به.
حارة اليهود مسلسل اتظلم بسبب كتابته بسرعه وعدم الاهتمام به بالقدر الكافى.. نعتقد ان اعادة تقديم العمل بسيناريو واخراج جديد ممكن يكون فرصة كويسه للكلام عن حقبة منسية من تاريخ مصر العظيمة.
