Tracers : فيلم عن الحب والباركور

رياضة الباركور واحدة من الرياضات الحديثة اللى اصبحنا بنشوف لها فيديوهات كتير على يوتيوب، بالاضافة لاهتمام قطاعات كبيرة من الشباب بممارستها وان كانت نسبتهم فى الدول الغربية والولايات المتحدة اكبر من المنطقة العربية فيما يتعلق بعدد ممارسين الرياضة. اما محبى حركات الباركور المفعمة بالحيوية والنشاط.. نقدر نقول انهم مئات الالاف.

المخرج الساعي الى الكمال دانيل بنمايور فى احدث اعماله بيحاول يقتحم عالم رياضة الباركور المثيرة من خلال مغامرة تيلور لوتنر اللى بيعاني من الافلاس، وبيحاول يسدد ديونه باي شكل لمجموعة من البلطجية المحترفين فى فرض الاتاوات والقروض بالفوائد المرتفعه، الامر اللى بيخليه يتعرف على مجموعة من ممارسى الباركور برعاية شاب بيعتبر قائد ليهم، ثم مع الوقت بيكتشف ان لهم علاقه بالعديد من العمليات الاجرامية، الامر اللى بيعقد الاحداث وبياخدها لمستوي اعلى.

بما اننا بنتكلم عن فيلم بيحكي عن رياضه قائمه على السرعه والحركه المفاجئة يبقى لازم نتكلم عن 3 امور مهمة : الاولى هى اسلوب الاخراج اللى قدر يطعم المشاهد بوجود الدوبليرز القادرين على القيام بالحركات الخطرة، وده كان من الامور الناجحة جدا فى الفيلم.

الامر الثاني هو الموسيقي التصويرية اللى قدرت تدخلنا لعالم رياضة الباركور والشباب اللى بيقدروا ينفذوا حركات خطرة ويقفزوا من مكان لاخر بسهولة ويسر، الموسيقي كانت من اهم العوامل اللى ساعدت على استمتاعنا بالفيلم فى واقع الامر.

الامر الثالث هى الديكورات، واللى للاسف لم تكن بالقوة اللى كنا متوقعينها، وكان المفروض تكون افضل علشان تتناسب مع مستوي الفيلم العالي والمتميز.

الاداء التمثيلي للابطال كان متوسط يميل للضعف، وبما ان التركيز الاساسى للفيلم كان على المشاهد الخطرة اللى تنوعت بين القفز من اماكن عاليه الى المشاهد المعتمدة على الاتزان ومشاهد الخروج والدخول لاماكن ضيقة وصعبة، لكن يبدو ان الاهتمام بالمشاهد دي سحب المخرج من الاهتمام بالاداء التمثيلي لابطاله.

Tracers فيلم عارف بالظبط مين الجمهور المستهدف له، وبيقدم لهم جرعه مناسبه من المشاهد الخطره والحركات الصعبة، مع حبكة سينمائية ينقصها الاداء التمثيلي.