The SpongeBob Movie: Sponge Out of Water : مغامرة جديدة لاسبونج بوب
بعض أفلام الأنيميشن بتقدم أفكارها بالاساس للكبار، والبعض الأخر بيخاطب الصغار، البعض الأخر بيخاطب الكبار والصغار على حد سواء، السؤال هو : المغامرة الأخيرة لـ(سبونج بوب) بتخاطب مين بالاساس؟
الأجابة المباشرة: هى ان الفيلم بالاساس بيخاطب جمهورة من صغار السن، الاطفال اللى بيحبوا المغامرات المصحوبة بالاغاني للأسفنجة خفيفة الدم (سبونج بوب)، واللى بتقدر تلاقى حل لاي مشكله بتقع فيها، ده اللى قدمه المخرج بول تيبيت فى أحدث افلامه، مع اداء صوتي من انطونيو بانديراس فى دور القرصان الشرير (برجر بيرد)، واللى بيسرق وصفة (سبونج بوب) الشهيرة للبرجر، الامر اللى بيعمل مشكلة كبيرة ل(سبونج) بتضطره للسفر فى الزمن للحصول على وصفته من جديد.
على الرغم من ان التركيز الاساسى لاعلان الفيلم، على دخول (سبونج بوب) للعالم الحقيقي، الا ان ده لم يحدث فى احداث الفيلم الا بعد نهاية نصف الفيلم الاول تقريبا، وده كان من الامور اللى جعلتنا نشعر باحباط، لكن الحقيقة ان الجزء اللى بيتناول احتكاك (سبنوج) بالعالم الحقيقي كان مضحك وكوميدي الى ابعد الحدود.
الموسيقي التصويرية للفيلم والاغاني كانت قوية، قد لا تكون بالقوة اللى نتوقعها، لكن فى المجمل كانت قوية ومركزه، لكن تقنيات العرض واسلوب الخدع كان اقل من المتوسط، وغير مناسب لفيلم بيعرض فى 2015، لكن الاداء الصوتي للابطال هو اللى كان مميز وقوي الي اقصى درجة.
Sponge Out of Water يعتبر فيلم قوي ومثالى لو عاوز تخلى اولادك يشوفوا فيلم عن قيمة التعاون وعمل الفريق باسلوب كوميدي لطيف، لكن لو عاوز تتفرج على فيلم انيميشن يغير طريقة تفكيرك نفسها، اكيد (سبونج بوب) مش هايكون الفيلم المناسب لده.
