The Peanuts Movie
بمجرد فرجتنا على أول دقائق فى فيلم Peanuts عرفنا احنا شوفنا الشخصية دي فين قبل كده.. دي الشخصية الاساسية فى الاعلان الترويجي اللى كنا بنشوفه قبل بداية كل عرض، واللى كان بيدعو المشاهدين بلطافه لاغلاق هواتفهم المحمولة علشان ما تضايقش باقى المشاهدين… للاسف ماحدش كان بيهتم.. لكن الفكرة بحد ذاتها كدعاية كانت متميزة.. وسبق وشوفناها فى بعض افلام الانيميشن مؤخرا.
من اخراج ستيف مارتينو واداء صوتي لـ فرانشيسكا كابالدي و بيل ميلينديز و نوح شناب و مارييل شيتس بنشوف قصة طفل صغير بيعاني من سوء الحظ و (النحس) فى حياته باستمرار، والاحداث بتزداد سخونة لما بتنتقل للحي بتاعهم بنت جميلة، بيحاول بكل الطرق انه يلفت انتباهها لكن سمعته اللى سابقاه فى مجال النحس وعدم القدرة على التصرف بجرأة بتمنعه طوال الوقت.. ياتري هايتصرف ازاي؟
الجميل فى الفيلم انه بيوصل للاطفال بشكل غير مباشر فكرة جميلة هى انهم لازم يتحلوا بالجرأة المناسبة علشان يكونوا الشخص اللى بيحلموا بيه.. ولازم يواجهوا الواقع ويتعلموا يحلوا مشاكلهم بنفسهم ويكون عندهم شخصية قوية.
من الحاجات اللى ماعجبتناش فى الفيلم ضعف الاداء الصوتي للابطال، ويمكن بسبب صغر سنهم او لمشاكل تقنية فى اخراج الفيلم نفسه ماحسيناش بالروح المناسبة للفيلم، او ماحسيناش بالهارموني اللى المفروض نحس بيه بين شكل الشخصيات وصوتها.. ده خلانا نحس بعدم الانسجام مع احداث الفيلم احيانا.
رسومات الفيلم البسيطة والجميلة، والاسلوب المتميز فى رسم الشخصيات والاهتمام بادق تفاصيلها كان من الامور الايجابيه فى الفيلم، كمان الموسيقي التصويرية اللى ظهرت بقوة ووضوح فى بعض المشاهد زي مشهد رقص الكلب فى غرفه صاحبه وغيرها من المشاهد اللى خليتنا نحس ان الفيلم بالفعل مميز فيما يتعلق بالموسيقي التصويرية.
فيلم The Peanuts من نوعية الافلام اللى كلامنا عنها ممكن يكون قليل، لكنه فيلم جميل ومناسب للمشاهدة فى منتصف الاسبوع وبدون توقعات ضخمة، لانه مش فيلم ضخم الميزانية او التأثير.. هو فيلم عارف بالظبط ايه المطلوب منه وبيقدمه بدون زياده او نقصان.
