The Hunger Games: Mockingjay – Part 2 : جزء اخير..اسطوري
لازم نعترف اننا مش من محبين سلسلة The Hunger Games ، خاصة بعد (مطها) وتطويلها لعدد من الأجزاء، خاصة الجزء الماضى واللى حسينا انه مجرد جزء تمهيدي للأحداث النهائية اللى شوفناها مع الجزء الحالى.. بالتالى كانت مشاهدتنا للفيلم احنا وكل القاعة الممتلئة بالجمهور كانت بالأساس لمشاهدة نهاية The Hunger games .. ولازم نعترف ان النهاية كانت فعلا اسطورية وتستحق المشاهدة,
من اخراج فرانسيس لورانس وبطولة جنيفر لورانس و جوش هيتشيرسون و ستانلى توتشى و وودى هاريلسون بنشوف نتيجة ثورة (كاتنيس افردين) على الرئيس (سنو) وعلى النظام الفاشي لـ(الكابيتول) المستمر فى ارتكاب المجازر بحق الثوار..
الفيلم بيبدأ أحداثه من نفس اللحظة اللى انتهى عندها المرة الأخيرة.. (كاتنيس) مصابة وحبيبها (بيتا) تم التلاعب فى جسده وتحويله لشخص محب للكابيتول، وعلى الرغم من تشكيله خطر على الفريق بيتم الدفع به من جديد للأحداث كنوع من الدعاية الايجابية للثوار وبيان انهم لسه قادرين على الصمود والتحدي.
المرة دي (كاتنيس) مش بتظهر كمجرد رمز للثورة على الكابيتول ورجاله، لكنها بتحمل سلاحها وبتبدا فى مواجهة الرئيس (سنو) فى اخر دورة العاب.. الدورة اللى بتتم فى المنطقة المحيطة بالمقر الرئيسي للكابيتول، فى محاولة اخيرة من (سنو) للسيطرة على الاوضاع قبل حدوث الثورة.
الأداء التمثيلي لكل فريق العمل كان متميز، ومن الواضح اناه مع استمرار عرض السلسلة اصبح كل بطل عارف بالظبط ايه المطلوب منه وايه بالظبط ابعاد الشخصية اللى بيقوم بأداءها وده ادي لارتفاع المستوي التمثيلي لكل الابطال.
نقدر نقول ان احداث الحركة فى الفيلم بدأت مع بداية النصف الثاني للاحداث وهى بداية متأخرة الى حد ما لكن المرة دي الاكشن فى الفيلم بيكتسب فى كتير من الاوقات صورة من صور الرعب، خاصة مع اطلاق الرئيس سنو للكائنات المتحولة جينيا واللى مثلت مع العرض بتقنية ثلاثية الابعاد بعض المشاهد الخاطفة والمرعبة للمشاهدين، ويمكن دي المرة الاولى اللى يتم دمج Segment مرعب مع احداث السلسلة وهو كان امر متميز الصراحة.
الموسيقي التصويرية تراجعت فى مستواها على حساب تقنيات العرض والجرافيك والديكورات اللى كان لها نصيب الاسد فى دخول المشاهدين للمود العام للاحداث زي ما عودتنا السلسلة، اما تراجع الموسيقي التصويرية فكان من العوامل السلبية اللى قابلتنا فى مشاهدة الفيلم.
لو ماشوفتش اي جزء سابق من The hunger games هاتكون بتضيع وقتك مع الجزء ده.. اما لو كنت زينا من المنتظرين للجزء الاخير من السلسلة نوعدك بمشاهدة متميزة تليق بنهاية The hunger games
